Экономиканың барлық салаларын, оның ішінде ауыл шаруашылығын цифрландыру – ел дамуының негізгі бағыты. Ақпараттық технологиялар ғарыш индустриясынан бастап денсаулық сақтау, білім беру және ауыл шаруашылығына дейінгі түрлі салалардағы кәсіпорындардың бизнес процесіне әсерін тигізуде. Еңбек өнімділігі мен өңделген өнім экспортының көлемін арттыру үшін АӨК цифрландырудың тиімді және қолжетімді құралдарын енгізу қажет.
Ауыл шаруашылығын цифрландыру технологияларын енгізу, ауыл шаруашылығы кәсіпорындарының бизнес процестерін автоматтандыру аграрлық бизнестің әсерін едәуір арттырады және ауыл шаруашылығы өнімдері айналымының процесін өзгертеді. Осы ретте, облыс бойынша ауыл шаруашылығы саласында бірнеше жоба іске асырылып, жұмысын жалғастыруда. Атап айтқанда, агроөнеркәсіптік кешенді цифрландыру мақсатында нақты егіншілік элементтерін енгізу және мал шаруашылығы саласы бойынша «ақылды фермалар» құру жұмыстары жүргізілуде.
Агроөндіріске сандық технологияларды енгізу және оларды кеңінен тарату мақсатында облыстық ауыл шаруашылығы басқармасының жетекшілігімен Ж.Жиембаев атындағы Қазақ өсімдік қорғау және карантин ғылыми-зерттеу институты, Қазақстан-Британ технологиялық университетінің инжиниринг және ақпараттық технологиялар институтымен бірлесіп, Шиелі ауданында орналасқан «Ақмая» ШҚ базасында нақты егіншілікке арналған «Akmaya Smart Farm» цифрлық платформасы жасалып, жоба іске асырылды. Жоба аясында шаруашылықтың 800 гектар егіс алқабына цифрландыру жұмыстары жүргізіліп, алынған деректер өңделді. Өңделген деректер негізінде алқаптың электрондық картасы және топырақ үлгілері бойынша агрохимиялық картограммалары әзірленді.
Шаруашылықтың қолда бар барлық ресурстарына кешенді аудит (техника, қызметкерлер, егіс алқаптары мен олардың пайдалану тарихы, өнімділігі, дақыл сорттары және т.б.) жүргізілді. Жоғарыда аталған барлық деректер «Akmaya Smart Farm» цифрлық платформасына жинақталды. Құрылған автономдық метеостанциялар топырақ, ауа, су, күн туралы деректердің толық спектрін жазып, деректерді нақты уақыт режимінде жүйенің орталық серверіне жіберіп тұрады. Метеодеректер ауа райы жағдайларын ескере отырып, өндірістік процестерді түзету, кризистік сәттердің (құрғақшылық, зиянкестердің жаппай көбеюі) алдын алу үшін қолданылады. Деректердің жиналуы зиянкес организмдердің пайда болуы туралы болжам жасауға және қорғаныс шараларын қолдану үшін алдын ала дайындалуға мүмкіндік берді. Нәтижесінде шаруашылықтың өндірісі артып, тыңайтқыштарды оңтайлы пайдалану есебінен 14 млн теңге қаржысы үнемделді.
«Ақмая» пилоттық шаруашылығы аймақтағы барлық фермерлер үшін демонстрация алаңына айналып, әр фермерге өз табысын қалай арттыруға болатыны, көбірек түсім алуы, тәуекелдерді басқаруы, техникамен жұмыс істеуі мәселелерін шешуге мүмкіндік берді. Осы ретте, тәжірибені басқа шаруашылықтарға тарату бойынша жұмыстар жалғасуда. Бұдан бөлек, 17 шаруашылық құрылымы сатып алған шетелдік ауыл шаруашылығы техникалары базасындағы нақты егіншілік элементтерін ішінара пайдалануда.
Ішкі нарықты көкөніс дақылдарымен қамтамасыз ету мақсатында былтыр Қызылорда қаласында «КазАгроМир» ЖШС көкөніс өсіретін жоғары технологиялы заманауи автоматтандырылған жылыжай кешені құрылысын салды. Бірінші маусымда 170 тонна қияр өндіріліп, ішкі нарыққа төмен бағада өткізілді. Бүгінде екінші айналымның алғашқы өнімдері жиналып, күніне 2 тонна қияр өндірілуде. Жылыжайда өсірілетін көкөністердің жыл бойына температурасы реттеліп, суару, тыңайтқыштарды беру процесстері автоматты түрде жүргізіледі.
Сонымен қатар, облыста «Мағжан и К» ЖШС елімізде бірінші сандық күріш өңдеу зауытының құрылысы бойынша жобаны іске асырды.
Заманауи технологияларға сай қондырғымен жабдықталған, көкөніс өнімдерін жыл бойы қалыпты температурада сақтайтын 2000 тонналық көкөніс сақтау қоймасының құрылысы жүргізіліп, өнімдер сақталуда. Ауыл шаруашылығы техникаларының бірыңғай мемлекеттік тізілімін қалыптастыру мақсатында «Автопоиск» бағдарламасы іске қосылып, жобалық деңгейде қызмет көрсетуде.
Бұдан бөлек, биыл облыс аумағында күріштің егістік алқаптарының жай-күйін ғарыштық мониторингтеу жобасы бойынша «Ұлттық ғарыштық зерттеулер және технологиялар орталығы» акционерлік қоғамымен бірлесіп жұмыстар жүргізілді. Аталған жоба өз кезегінде жерді қашықтан зондтау, күріш егісі алқабының электронды карта-сұлбасын әзірлеуге жол ашады. Мониторингтеу арқылы күріш себу мерзімдерін және нақты егілген көлемін анықтауға, егіс алқабындағы жылу ресурстарының жиналу динамикасын зерделеуге, агрометеорологиялық жағдайларды талдау негізінде күріш егісінің жай-күйін бағалауға, күріш өнімділігінің болжамды көлемін есептеуге, егістіктің ластануы мен тұздануын спутниктік бағалауға мүмкіндік береді.
Мал шаруашылығы саласы бойынша облыстағы репродуктор шаруашылықтарда жылжымалы станок-фиксатор, ауыспалы жүктемелік, автоматты суарғыш, жылытатын құрылғылар, баламалы энергия көздері және GPS-навигаторлары пайдаланылуда.
Бұдан бөлек, цифрлық технологияларды енгізу мақсатында 30 репродуктор шаруашылықта 8,4 мың бас асыл тұқымды ірі қараға және 85 репродуктор шаруашылықта 104,0 мың бас асыл тұқымды қойға электронды бірдейлендіру тәсілдері пайдалануда. Ауыл шаруашылығы өнімдерінің электронды саудасын жүйелендіру және агроөнеркәсіп кешенінің экспорттық әлеуетін арттыру мақсатында «Агробиржа» электрондық сайты бар. Сайтта тауар өндірушілер арасында электронды сауда жасауға және басқа да ауыл шаруашылығы өнімдерін өткізуге мүмкіндік беретін Web-ресурс құрылып, электронды сауда нарығын кеңейтуге мүмкіндік береді. Онда 491 хабарландыру және 483 жаңалық орналастырылып, қолданушылар саны 1210 адамды құрады.
Ауыл шаруашылығы басқармасының ауыл шаруашылығы кооперациясы
және экспорт бөлімі
>>> Біздің Facebook, Instagram парақшаларымыз бен Telegram каналымызға жазылыңыз! <<<
