Мәжілістің Экономикалық реформа және өңірлік даму комитетінде кейбір заңнамалық актілерге бәсекелестік мәселелері бойынша өзгерістер мен толықтырулар енгізу туралы заң жобасының таныстырылымы өтті. Жиынға Мәжілістің вице-спикері Альберт Рау, мемлекеттік органдардың өкілдері, кәсіпкерлер мен сарапшылар қатысты.
Отырысты ашқан комитет төрағасы Нұртай Сабильянов заң жобасы Мемлекет басшысының 2023 жылғы 1 қыркүйектегі Жолдауын, сондай-ақ оның бәсекелестікті реттеу тиімділігін арттыру бойынша заңнамалық шаралар кешенін қабылдау туралы тапсырмасын іске асыру үшін әзірленгенін атап өтті.
– Заң жобасының мақсаты – тауар нарықтарын монополиясыздандыру және мемлекеттің кәсіпкерлікке қатысуын қысқарту. Бұл үшін түзетулерде монополиялық нарықтардағы бақылауды күшейту, экономикалық шоғырлануды бақылауды кеңейту, тауар нарықтарын тергеп-тексеру мен талдаудың тиімділігін арттыру, бұзушылықтардың алдын алу құралдарын жетілдіру, мемлекеттік монополия және арнаулы құқық субъектілерін қысқарту, тұтынушыларға қаражатты қайтару тетігін енгізу сияқты бағыттар қарастырылған, – деді Нұртай Сабильянов.
Түзетулерді депутаттарға Бәсекелестікті қорғау және дамыту агенттігі төрағасының бірінші орынбасары Рустам Ахметов таныстырды.
– Мемлекет басшысының ел экономикасын ырықтандыру туралы жарлығы аясында монополиялық нарықтарды қоспағанда, барлық тауар нарығын барынша реттеу туралы бұйрық қабылданды. Алайда монополистік құрылымы бар нарықтар да бар. Бұлар – олармен тікелей байланысты отын-энергетикалық кешен, көлік, байланыс және қызмет көрсету нарықтары. Біз оларды қайтарып, баға белгілеуді бақылауды ұсынып отырмыз, – деді Р.Ахметов.
Сондай-ақ ол монополияға қарсы тергеуді жеңілдететін нормативтік құқықтық актілерге де тоқталды. Онда кәсіпкерлік субъектілеріне бұзушылықтарды өз бетінше анықтау және жою мүмкіндігі беріледі.
Тағы бір жаңалық – қазақстандық тұтынушылардың атынан топтық талап арыз беру мүмкіндігі. Ұсынылып отырған тетік монополияға қарсы істер және басқа да бұзушылықтар бойынша тұтынушыларға қаражатты қайтаруды қамтамасыз етеді.
Бұдан бөлек заң жобасына тауар нарықтарын талдауды жетілдіру, мемлекеттің кәсіпкерлікке қатысуын қысқарту, мемлекет пен кәсіпкерлер арасындағы мәмілелерді талдау және басқа да нормалар енгізу ұсынылды.
Талқылау барысында депутаттар бәсекелес нарықта мемлекеттік кәсіпорындар қызметінің тиімділігі мен орындылығы, өңірлерде табиғи монополиялардың шағын субъектілері үшін оңайлатылған тарифтер енгізу мүмкіндігі, банктік қызметтер нарығын монополияландыру және басқа да мәселелерді көтерді. Сонымен қатар олар топтық талап-арыздарды қарау тетігінің жеткілікті түрде дамымағанына қатысты алаңдаушылықтарын бірнеше рет білдірді.
Талқылау қорытындысында комитет төрағасы Нұртай Сабильянов жұмыс тобы мүшелерінен жиын барысында қойылған сұрақтар мен ұсыныстарды ескеруді сұрады. Заң жобасын одан әрі талқылау депутат Анас Баққожаевтың жетекшілік ететін жұмыс тобында жалғасады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
