ҚР Мемлекеттік қызмет істері агенттігінің облыс бойынша департаменті басшысы Рафхат Бисенов пен Қорқыт ата атындағы Қызылорда университеті ректоры Бейбіткүл Кәрімова әріптестік меморандумына қол қойды.
Басқосуда университет ректоры әріптестік бағытта жұмыс істеудің тиімділігін және өткен жылы іргелі оқу орнын тәмамдаған түлектердің 90 проценті жұмысқа орналасу мүмкіндігіне ие болғанын атап өтті. Ал, Рафхат Бисенов келісім аясында 3 негізгі бағыт қамтылатынын баяндады.
– Бірінші, мемлекеттік қызметке кадрларды дайындау сапасын көтеру, кадр әлеуетін пайдаланудың тиімділігін арттыру мақсатында университетте «Мемлекеттік қызмет мектебі» жобасын жүзеге асыру керек. Жаңа форматтағы кадр қызметкерлерін дайындау мақсатында HR-мамандарды оқытуды қолға ала аламыз. Бұл үшін университет базасында «Адам ресурстарын басқару» бағдарламасын жүзеге асыруға болады. Бұл бағдарлама жаңа жылдан бастап енгізіледі, алдағы уақытта арнайы мамандық ретінде де ашу мүмкіндігі қаралады. Үшіншіден, мемлекеттік қызметтерді көрсету сапасы мен қолжетімділігін арттыру, электронды форматта көрсетілетін қызметтердің үлесін көбейту және тұрғындардың мемлекеттік қызметтерді алуына қолайлы жағдай жасау мақсатында университетте «Өзіне-өзі қызмет көрсету бұрыштарын» ашу көзделуде, – деді департамент басшысы.
Меморандумға сәйкес, университетті бітіруші курс студенттерінің ҚР Президентінің жанындағы Мемлекеттік басқару академиясының Қызылорда облысы бойынша филиалы базасында шеберлік сабақтарынан өтіп, мемлекеттік органдарда өндірістік тәжірибеден өтуі де жоспарда.
М.СНАДИНҚЫЗЫ
>>> Біздің Facebook, Instagram парақшаларымыз бен Telegram каналымызға жазылыңыз! <<<
