Тұрғындардың әлеуметтік жағдайы, денсаулығы, тұрмыс-тіршілігіндегі түйткілдер биліктің қолдауын күтеді. Бұл ретте депутаттар халық пен билік арасындағы алтын көпірге айналуы тиіс. Президентіміз Қасым-Жомарт Кемелұлы «Халық үніне құлақ асатын мемлекет» тұжырымдамасында елмен етене жұмыс істеуге шақырды. Тұжырымдама партия атынан сайланған облыстық мәслихат депутаттарына да үлкен міндеттер жүктейді.
Депутаттық міндеттері мен құзыретімізге сәйкес жетекшілік ететін мәселелер, салалар айқындалды. Олардың ең негізгісі қоғамдағы рухы биік қайсар жандарды қолдау. Ерекше қажеттілігі бар азаматтардың кедергісіз қолжетімділігін қамтамасыз ету мақсатында, бұрын салынған тұрғын үйлердің, қоғамдық ғимараттардың (меншік түріне қарамастан), аялдамалар мен тротуарлардың 55%-ін мүмкіндігі шектеулі азаматтарға қолжетімді етіп бейімдеу мәселелері де бар. Мүгедектігі бар адамдарға өз бетінше, онлайн режимде өздерінің жеке қажеттіліктерін ескере отырып, көмекші компенсаторлық құралдар мен әлеуметтік қызметтерді сатып алуға мүмкіндік беретін әлеуметтік қызметтердің бірыңғай порталына толық көшудің де қажеттілігі туып тұр.
Сонымен қатар, балаларды инклюзивті біліммен толық қамтуды 100%-ке дейін арттыру қажет. Арал, Қазалы қалаларында, Жалағаш, Тереңөзек, Шиелі, Жаңақорған, Байқоңырда 9 ресурстық инклюзивті орталықтарды ашу және оларды мамандармен қамтамасыз ету мәселелері де кезек күтіп тұр.
Қызылорда қаласында 2025 жылға қарай қоғамдық көліктерді толықтай электронды жүйеге көшіру бағыты да көп жұмысты қажет етеді.
Сайлауалды бағдарламамның негізгі бағыттарының бірі – электронды сауда мәдениетін дамыту болатын. Қолма-қол ақшасыз есеп айырысу жүйесі бар сауда объектілерінің желісін кеңейту қажет. Кәсіпкерлердің онлайн кассалық аппараттарын пайдалануын 100%-ке дейін жеткізу маңызды.
Сонымен бірге, кураторлық территориялық аумақтарым Қызылорда қаласының «Сәулет», «Саяхат» аумақтары болып белгіленді. Бұл ретте мәслихат депутаттығы барысында тұрғындармен тығыз қарым-қатынас орнату, проблемалар, мәселелерден хабардар болу мен үшін аса маңызды.
Бұған дейін екі рет секция жұмысына қатысып, көтерілген мәселелерді талқылауға қатыстым. Партияның ғимаратында екі мәрте қоғамдық қабылдау өткіздім. Қабылдауға келген тұрғындар баспана, құқықтарының бұзылуы, тиісті емдерін ала алмай жүргенін, т.б мәселелерін айтты. Өз депутаттық қызметімнің аясында барлық түскен өтініштерді зерделеп, тиісті органдардың жауабын алып, халыққа көмектесуге кірістім. Көп сұрақтар өз жауабын тапса, әлі қаншама мәселелер біздің араласуымызды, ашықтықты, заңдылықты күтіп тұр.
Елбасы, «Nur Otan» партиясының Төрағасы Нұрсұлтан Назарбаев өзінің «Сенім. Диалог. Болашаққа нық қадам – «Nur Otan» партиясының жеті серпіні» атты партия жұмысын жүйелі жаңғырту бағдарламасында, «Біз партияның күнделікті жұмысын айтарлықтай жандандырып, халықтың сұранысына алдын ала жауап беруді үйренуіміз керек» және «Партия мүшелері шенеунік емес, халықтың адамы екенін жадынан шығармауы тиіс» деген болатын. Ұлт көшбасшысының бұл сөздері бізге де үлкен жауапкершілік жүктейді. Сондықтан біздің белсенді жұмысымыздан еліміздің болашағы мен беделі айқындалады. Ашық әрі сапалы қызмет етуге күш саламыз.
Аида ӘБИБУЛЛАЕВА,
облыстық мәслихат депутаты
>>> Біздің Facebook, Instagram парақшаларымыз бен Telegram каналымызға жазылыңыз! <<<
