Кеше облыс әкімі Гүлшара Әбдіқалықова облыстық ауыл шаруашылығы басқармасының басшысы Талғат Дүйсебаевтың тұрақтандыру қоры мен баға мониторингі бойынша есебін тыңдады.
Жыл басынан бері әлеуметтік маңызы бар азық-түлік тауарларының ішінде 15 түрлі өнімнің бағасы жоғарылап, 3 өнімнің бағасы төмендеген.
Басқарма басшысының айтуынша, күнбағыс майы мен қант бағасының өсуі әлемдік нарықтағы сұраныстың жоғарылауынан туындады. Ал, қарақұмық жармасының қымбаттауы сол өнімді өндіруші солтүстік өңірлердегі түсімнің төмен болуынан, сондай-ақ көршілес Ресейде де өнім бітік шықпай қалған. Ал, рожки бағасының өсуі бидай экспортының ұлғаюы және оның қымбаттауына байланысты. Сонымен қатар, картоп, сәбіз, қырыққабат, пияз нарқында да маусымаралық кезенде өсім бар. Мұндай жағдай республиканың барлық аймағына тән құбылыс.
Баға тұрақтылығын сақтау мақсатында Түркістан облысындағы картоп, қырыққабат, сәбіз өсіруші шаруашылықтармен байланыс орнатылып, қазір бұл тауарлардың бағасы қалыпқа келген. Картоп – 140-145, сәбіз – 180-185, пияз – 130-135, қырыққабат 140-145 теңгеден сатылуда.
Бағаның негізсіз өсуіне жол бермеу үшін облыстың тұрақтандыру қорынан тауарлық интервенциялар жүргізу, сондай-ақ «айналым» схема бойынша бағаны тұрақтандыру механизмі аясында заем беру арқылы шаралар қабылдануда.
Қазіргі таңда тұрақтандыру қорында 190,4 млн теңгені құрайтын 1069,2 тонна өнім бар. Оның ішінде бірінші сортты бидай ұны – 616,5, күріш – 99, қант – 235,4, макарон – 73,3, қарақұмық жармасы – 21,9, сүт – 23,1 тонна.
Бүгінде тұрақтандыру қорының өнімдері мен заем берілген 5 кәсіпкерлік субъектісі арқылы алынып жатқан өнімдер Қызылорда қаласында орналасқан 31 әлеуметтік дүкенде, 1 әлеуметтік маркетте және Қызылорда қаласының 5 ірі супермаркеттерінде сатылуда.
Биыл қосымша 5 әлеуметтік дүкенді пайдалануға беру жоспарланған. Айта кету керек, әлеуметтік дүкендер мен бұрыштарда әлеуметтік маңызы бар азық-түлік тауарлары нарықтан біршама төмен бағада сатылуда.
Сондай-ақ, баға тұрақтылығын сақтауда жыл басынан қала және аудандарда 15 жәрмеңке ұйымдастырылған.
Басқарма басшысы өңірде азық-түлік тауарларына баға белгілеудің тізбегі бойынша делдалдық схемаларды тексеру жөніндегі комиссия құру тапсырмасына сәйкес оның құрамын бекіту жобасын келісуге ұсынды.
Тамыз айының алғашқы онкүндігінен бастап астық өндіруші өңірлерде бидай, ұн бағасының қымбаттауы байқалады. Бұл ретте облыс көлемінде наубайхана иелерімен кездесулер ұйымдастырылып, негізсіз баға көтермеу жөнінде түсіндірме жұмыстары жүргізілуде.
Облыс әкімі азық-түлік бағаларына тұрақты мониторинг жүргізіп, негізсіз баға көтеруге жол бермеу керек екенін қатаң ескертті. Тұрақтандыру қоры жұмысын бақылауға алып, әлеуметтік маңызы бар негізгі азық-түлік тауарларының жеткілікті болуын мұқият қадағалауды тапсырды.
Облыс әкімінің
баспасөз қызметі
>>> Біздің Facebook, Instagram парақшаларымыз бен Telegram каналымызға жазылыңыз! <<<
