Жуырда Жанқожа батыр ауылына жол түсті. «Тірек ауыл» санатын иеленген елді мекеннің қазіргі көрінісіне көңіл толады. Ауыз толтырып айтарлықтай жағымды жаңалықтар аз емес. Осы жылдың өзінде Мәдениет үйі мен бірнеше көшеге жөндеу жасалды. Оған қоса, талай жылдан бері ауыл тұрғындары зарыға тосқан ауызсу құбырын сервистік желіге қосу жұмыстары басталады деп күтілуде.
Десе де, адамның арманы таусылған ба?! Санамның бір түкпірінде «Ауылдың ахуалы бөтен емес. Көп жерде кездесе бермейтін спорт кешені, өзге де нысандар салынып, көшелер асфальтталды, түнгі жарықпен қамтылды. Көп кешікпей ауызсу құбыры үйлерге кіргізіледі. Енді газ құбыры тартылса, шіркін! Ондай жағдайда ауылдың келбеті аудан орталығынан кем болмасы анық» деген ой жылт ете қалды. Газ келсе несі бар?! Бұйырса, ондай күнге де жетерміз.
Ащы көлдің қырқасына көтерілгенде тосын әрі қызықты көрініске тап келдік. Ауылдың төлқұжаты іспетті ежелгі көл көкжиекті көмкеріп, ернеуінен асып, шалқып жатыр. Толқыны жағалауды ұрып, төсінде түрлі құстар жүзген айдынға қатты сүйсіндік. Ал іргедегі биік төбенің басында шағыл құмға бауырын төсеп, қаз-қатар жатқан түйелердің қалың келесін байқағанда таңданысымыз арта түсті. Керемет, көрініс! Маңайға асқақ кейіпте көз тастаған, қос өркеші баладай, шетінен күйлі ойсылқара тұқымы тым айбынды-ақ. Ақиқатына көшсек, бұған дейін баба атындағы ауылда мұншама түйені көп кездестіре бермеуші едік. Шаруа қауымның шөлге төзімді осынау киелі түлікті маса-сонадан қорғаштап, Сыр беткейіне аса жолата бермейтіні әмбеге аян. Енді жерсіндірсе неге масаттанбасқа?!
Оны айтасыз, Жанқожа батыр ауылында мемлекеттен несие алып, түйе өсіріп, өнімін ұқсатып отырған жеке кәсіпкер бар екен. Қолымыздағы деректе «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасының» екінші бағыты бойынша Алтынай Атымбаева қайтарымсыз грант алып сиыр өсіруде. «Микробизнес-Қызылорда» өңірлік бағдарламасы арқылы Нұргүл Маханова 2 млн теңге несиеге 4 түйе, 1 бота алып түйе шаруашылығымен айналысуда. 2018 жылы Гүлбану Әлиева жылқы өсіру бағытында «Ауыл шаруашылығын қолдау қоры» арқылы 2,5 млн теңге несиеге жылқы алған. Бір сөзбен айтқанда, мұның бәрі ауыл кәсібінің алға басуына дәнекер болып отыр.
Ал есімдері аталған Алтынай, Нұргүл, Гүлбану бір үйдің келіндері екенін білесіз бе? Абысын тату болса, ас көп деген осы. Мінажадин ағамыз бен Гүлжахан анамыздың шаңырағындағы келіндер осылай ауылдың шаруасын дөңгелетуге себепкер болуда. Мінажадин ағамыз мал шаруашылығының білікті маман, округ әкімдігінде ұзақ уақыт бас маман қызметін атқарған. Қысқасы, осындай берекелі бастаманы ұйыстырып, еңбектен өнбек жолын сабақтап отырған үлкен отбасының өнегесі өзгелерге де ой салса керек. Айтпағымыз осы еді.
Қазалы ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
