Кеше облыс әкімі Гүлшара Әбдіқалықованың қатысуымен Социалистік Еңбек Ері, батыр ана Сәлима Жұмабекованың өмірі мен еңбек жолына арналған “Өмірі өнеге ғасырдың Батыр анасы” атты ғылыми-танымдық конференция өтті.
Жиынға ҚР Парламенті Сенатының депутаты Ақмарал Әлназарова, ҚР Ұлттық ғылым академиясының академигі, техника ғылымдарының докторы, профессор Уәлихан Бишімбаев, Әл Фараби атындағы Қазақ ұлттық университетінің профессоры, филология ғылымдарының докторы Фатимабибі Дәулет, ҚР Ұлттық ғылым академиясының академигі, техника ғылымдарының докторы, профессор Қылышбай Бисенов, Қазақстанның Еңбек Ері, облыстық күріш өндірушілер және өңдеушілер қауымдастығының президенті Абзал Ералиев және бірқатар белгілі тұлғалар, еңбек озаттары, ғалымдар мен жазушылар қатысты.
Конференцияны облыстық мәслихат хатшысы, тарих ғылымдарының кандидаты Наурызбай Байқадамов жүргізді.
Облыс әкімі еңбектен бақыт тапқан Сыр елінің батыр анасы Сәлима Жұмабекованың өмірлік ұстанымын сөзге арқау етті.
– Тағдырдың талай тауқыметіне қазақ әйеліне тән қайсарлықпен, төзімділікпен қарсы тұрған «Ғасырдың Батыр Анасы» талай сынақты басынан өткерді. Сауыншы да, бақташы болды. Алайда, еңбегінің мәнін күріш алқабынан тапты. Бірақ, ең қиыны, өмірлік серігін де күріш алқабында мәңгіге жоғалтты. Ерінің жұмыс кезінде қайғылы қазаға душар болғанына қарамастан, отырып қалмай, бір қолымен сәбиін, бір қолымен Сыр маржанын қорғаштап, ерлермен бірдей иық тірестіре еңбек етті.
Ұрпағымен бірге көркейіп, бейнеттің зейнетін көрді. Ел мен жерге жасаған қалтқысыз еңбегі өзін ұшар биікке көтерді, шексіз алғысқа бөледі. Сөйтіп, халқымыздың мақтан тұтар аяулы аналарының біріне, тіпті бірегейіне айналды, – деді Гүлшара Әбдіқалықова.
Қазақстан Республикасы Ұлттық ғылым академиясының академигі, техника ғылымдарының докторы, профессор Қылышбай Бисенов «Еңбектен бақыт тапқан Батыр ана» туралы кең көлемді, терең мазмұнды баяндама жасады. Баяндама барысында Сәлима анамыз сынды өнегелі өмір иелерін ұрпақ алдында ұлықтай отырып, «Әлемнің әміршісі – еңбек» екендігін жастардың жадына құя берудің маңызы зор екенін айтты.
Педагогика ғылымдарының докторы, облыстық қоғамдық кеңес төрағасы Бақытжан Сайлыбаев дала дүбіріне үн қосып, дарабоз тұлғасын қалыптастырған ардақты жанның әр кезеңдегі қайраткерлік бітім-болмысын үлгі етті.
Конференция қонағы, техника ғылымдарының докторы, профессор Уәлихан Бишімбаев 1976 жылдары Қызылорда облысында қызмет атқарған тұсында өңірде ауыл шаруашылығы мамандарын дайындайтын жоғары оқу орны болмағанын, осы жылдары Жамбыл облысындағы гидромелиоративтік – құрылыс институтының филиалы ашылып, осынау оқу орнының алғашқы қалыптасу кезеңінде көптеген қиындықтар туындап, сол мәселелерді шешуде Жоғарғы кеңес депутаты Сәлима Жұмабекованың ықпалы болғанын, бұл оқу орнынан ауыл шаруашылығына қажетті мыңдаған мамандар даярланып шыққанын айтты.
Қазақстан Республикасы Жаратылыстану ғылымдары академиясының академигі, ауыл шаруашылығы ғылымдарының докторы, профессор Қазыбай Бозымов Ы.Жақаевтың өнегелі жолын биік ұстап, өңірдің дамуына қажыр-қайратын жұмсаған қадірлі жандардың еңбегін дәріптеп, абыройын аспандатып жатқан Сыр халқына деген риясыз құрметін жеткізді.
Ал, ауыл шаруашылығы ғылымдарының докторы Әсет Тоқтамысовтың айтуынша, Сәлима апамыздың 80 жылдығына орай Қазақтың күріш ғылыми-зерттеу институтының Құрманбек Бәкірұлы бастаған селекционер – ғалымдары жаңадан «Сәлима» атты күріш сортын шығарса ол жаңа сорт институттың тәжірибе алаңында жылда егіледі.
Әл Фараби атындағы Қазақ ұлттық университетінің профессоры, филология ғылымдарының докторы Фатимабибі Дәулет асыл жан өмірден өтсе де, оның қадір-қасиетін бағалайтын халқы барда есімі мәңгі ұлықтала беретіндігін айтып, алыс-жақыннан жиылған қауымға алғыс білдірді.
Конференцияны облыс әкімі қорытындылап, алдағы уақытта да адал еңбегімен ел құрметіне бөленген тұлғаларды насихаттау шаралары жалғасын табатынын жеткізді.
Ғазиза Әбілда,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
