Кейінгі кезде бағасы күрт көтерілген өнімнің бірі – күнбағыс майы. Өткен жылы 1 литрінің құны 400 теңгеден сәл жоғары болса, нарықтағы қазіргі бағасы 700 теңгеге жуықтады. Азық-түлік тізімінде алғашқы болып тұратын өнімнің қымбаттауына не себеп болды?
Бұл – бізде ғана емес, барлық өңірде, тіпті әлемде қалыптасқан жағдай. Өткен жылдың қазан айынан бастап өсімдік майы бағасының шарықтауына шикізаттың қымбаттауы әсер еткені хабарлана бастады. Күнбағыс дақылын өндіруде көш бастап тұрған Шығыс Қазақстан облысы жуықта шикізатсыз қалуы да мүмкін. Бұл, әрине, күнбағыс майының қымбаттауына әкелетіні белгілі. Майлы дақылдар тікелей Қырғызстанға, Өзбекстан мен Түркияға, Қытайға тасымалданады. Осының салдарынан жергілікті май зауыттары шикізатсыз қалып отыр.
ҚР Сауда және интеграция министрлігінің өткен жылы қазанда берген түсіндірмесінде күнбағыс майы бағасының өсу себебі тұқымның жетіспеуі, егіс көлемінің қысқаруы, импорттың азаюынан екені айтылған. Қалай десек те, шикізат тапшылығына орай бұл мәселенің күрмеуі алдағы күзде дақылдың түсіміне байланысты шешілмек.
Ал Сыр елінде күнбағыс майы өндірілмейтіндіктен, өнім Шығыс Қазақстаннан бөлек, Алматы, Ақтөбе және Солтүстік Қазақстан облыстарынан және Ресейден жеткізіледі. Сондықтан күнбағыс өсіруге бейімделген өңірлердегі жағдай басқа облыстарға да айтарлықтай әсер етуде.
Баға осылай көтеріле бере ме? Бүгінде облыс әкімдігі әлеуметтік маңызы бар азық-түлік тауарларына шекті баға енгізу арқылы тұрақтандыру жұмыстарын жүргізуде. Өңірде І категориялы тауық жұмыртқасы мен күнбағыс майының бағасы бекітілген шекті мәндерінен 15 процент артуына байланысты 90 күн бойы жұмыртқаның 10 данасының бағасы 430, ал күнбағыс майының 1 литрі 632 теңге көлемінде шектелмек.
Айта кету керек, Қызылорда қаласының ішкі нарығында әлеуметтік маңызы бар 19 түрлі азық-түлік тауарының бағасын негізсіз қымбаттатпау және бағаны тұрақтандыру бойынша қала әкімдігі бірқатар кәсіпкермен, тауар жеткізуші кәсіпорын басшыларымен ортақ меморандумға қол қойды.
Жұмыртқа мен күнбағыс майын да шекті баға арқылы осы сауда орындарынан алуға болады. Сондай-ақ, тұрғындарды нарық бағасынан 10-15 процентке төмендетілген өніммен қамтамасыз ету үшін ірі сауда орындарында әлеуметтік сөрелер орналастырылған.
Бүгінгі күні тұрақтандыру қорының өнімдері мен заем берілген 4 кәсіпкерлік субъектісі арқылы алынып жатқан өнімдер Қызылорда қаласындағы 29 әлеуметтік дүкен мен 1 әлеуметтік маркетте және «Қызылорда Оптомаркет», «Ажар сити», «Мирас», «Анвар», «Аль-Асад» супермаркеттеріндегі келісім бойынша ашылған әлеуметтік бұрыштарда сатылуда.
Айдана ЖҰМАДИНОВА
>>> Біздің Facebook, Instagram парақшаларымыз бен Telegram каналымызға жазылыңыз! <<<
