Облыстық индустриялық-инновациялық даму басқармасының басшысы Ринат Сұлтангереев өңірлік коммуникациялар қызметінде өткен брифингті «Қарапайым заттар экономикасы» бағдарламасы туралы ақпар беруден бастады. 2019 жылы бастау алған бағдарламаның мақсаты – импорттық әлеуметтік маңызды азық-түлік тауарларын жергілікті өнімдермен алмастыру және өнімнің басым түрлерін шығаратын отандық тауар өндірушілерге қаржылық қолдау көрсету.
Басқарма басшысы аталған бағдарлама бойынша несиелендіру шарттарына бірқатар түзетулер енгізілгенінен хабардар етті. Атап айтқанда, кәсіпкерлерді несиелеу мөлшерлемесі жылдық 8%-тен 6%-ке төмендетіліп отыр. Жеңілдік кезең енді несие мерзімінің 1/3 бөлігіне берілетін болады. Сондай-ақ қарыз сомасының 50%-не дейін кепілдік беру енгізілген. Айналым қаражатын қарыз сомасының 50%-не дейін толықтыру мүмкіндігі қарастырылады. Клиенттер үшін кепілзаттық саясаты жеңілдетілген. Мысалы, 3 млрд теңгеден 5 млрд теңгеге дейінгі несиелер бойынша кепілдік мөлшері 30%-ке дейін ұлғайтылды. Ал жарғылық капиталында мемлекет үлесі 50%-тен аспайтын кәсіпорындарға бағдарламаға қатысуға рұқсат беріледі. Екінші деңгейлі банктер мен «Аграрлық несие корпорациясы» облигацияларын сатып алу мерзімдері 7 жылдан 10 жылға дейін ұзартылған.
Спикер журналистерге бағдарламаның орындалуына мониторинг жүргізу мақсатында жобалық кеңсе жұмыс жасайтынын жеткізді. Облыс бойынша жобалық кеңсе аясында жалпы құны 12,9 млрд теңге құрайтын 161 жоба қамтылған. Қазіргі таңда құны 8,7 млрд теңге болатын 110 жоба мақұлданған. Оның ішінде Қызылорда қаласында 38, Шиелі мен Жаңақорған аудандарында – 16 жобадан, Сырдария аудандарында 9, қалған аудандарда 7-8 жобадан қамтылған. Осы жобалардың іске асырылуымен бетон құбырлары, жемшөп өнімдері, ұзақ уақытқа арналған ұннан жасалатын кондитерлік өнімдер өндірісін құру, жиһаз өнімдерінің ассортиментін кеңейту күтілуде. Мақұлданған жобалардың ішінен жалпы құны 1,2 млрд теңгені құрайтын 76 жоба мал шаруашылығын дамытуға бағытталып отыр.
Бағдарламаның екінші бағыты – жергілікті қамтуды дамыту. Р.Сұлтангереев осы орайда Үкімет жыл сайын тауарларды сатып алуда жергілікті қамту үлесін 20%-ке арттыру міндетін қойып отырғанын мәлімдеді.
Журналистерді қызықтырған мәселе шыны зауытының құрылысы болды. Басқарма басшысы шыны зауытында жұмыстардың 70% аяқталғанын айтты. Оның пешін құрастыратын шетелдік мамандардың келуіне пандемия бөгет
болды. Енді наурыз айында оларды елге кіргізуге мүмкіндік болады деп болжануда. Мұның бәрі сәтті болған жағдайда екінші жартыжылдықта зауыттағы жұмыс аяқталуы тиіс.
Басқарма басшысы зауыт орналасқан индустриялық аймақта шыны-пластикалық құбыр, шыны талшықтар, айна, шыны ыдыстар өндіруге бағытталған ілеспе жобаларды іске асыру бойынша жұмыстар жүргізіліп жатқанын мәлім етті. Олар болашақта зауыттағы шыны қалдықтарын, шыны сынықтарын шикізат ретінде пайдаланатын болады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
