– Өзі бір мың болғыр жан екен. Өркені өсіп, еңбегі жансын айналайын!
– Иә, қашанда қамқор, тынымсыз Әсемкүлдей кісі көп болса ғой, шіркін?!
Кент тұрғындарының арасында Әсемкүл Ерғалиева жайындағы осындай жылы лебізді жиі естисіз. Себебі, ол – шындығында да алғыс алуға, өнеге тұтуға, мақтан етуге тұрарлық жан. Әлеуметтік салада 35 жылдан астам уақыттан бері қызмет жасап, құрметке бөленіп жүр. Қарауында 18 жасқа дейінгі – 1, және одан жоғары 5 мүгедек бала бар. Соларға күн сайын түрлі қызметтер көрсетіп, қолдан келген жәрдемін аямай өз балаларындай айрықша ықыласпен қарайды. Олар да Әсемкүл апайларына әбден бауыр басып алған. Әрдайым іздеп, көрген сәтте мәз-мәйрам болып, қуанғандарын жасыра алмай, көздерінде нұр ойнап шыға келеді.
– Біздің міндетіміз – мүгедек жандардың мұң-мұқтаждарына жәрдемдесу, мүмкіндігінше мейірім-шуағына бөлеп, қоғамда өзін жалғыз сезінуіне жол бермеу, өмірге деген құлшынысын арттырып, келешекке сенімін нығайту, – дейді Әсемкүл Ерғалиева. Осы орайда әрқайсысының мінез-құлқына сәйкес жылы қабақ танытып, көмек беріп, көңілдерін көтеріп, күн сайын өздерін жақсы сезінуіне ықпал жасап отырамыз.
Негізінен әлеуметтік қызметкерлер 8 бағыт бойынша – әлеуметтік-тұрмыстық, медициналық, педагогикалық-психологиялық, экономикалық және құқықтық бағыттар бойынша қызмет көрсетеді. Әр мүгедек баланың денсаулығын қорғау, емханаларға апарып, тиісті дәрі-дәрмектерін алу, басқа да түрлі мемлекеттік қызметтерді пайдалануына жәрдемдеседі. Әсіресе әлеуметтік төлемдерді уақытылы алу жұмыстарына игі ықпал жасап үй ішіндегі тұрмыстық жағдайларына қол ұшын береді. Мереке күндері олардың мәдени-спорттық шараларға қатысуына көмектесу, еңбекке баулу, әр баланың қолөнермен, сурет салумен, басқа да түрлі шаруашылықпен айналысуына жағдай жасау секілді тірліктер – өз алдына бір төбе.
Өз ісінің маманы Әсемкүл Ерғалиева ұзақ жыл бойы тынымсыз еңбегі үшін түрлі Алғыс хаттармен марапатталған. Өзінің өмірлік тәжірибесін кейінгі жастарға үйретуден де жалыққан емес. Әлеуметтік саланың қиындықтары мен қуанышты сәттерін әріптестерімен бірге және өзі күтімге алған балалармен қосыла көріп жүр. Қоғам алдындағы міндеттерін атқарғанына шүкіршілік етеді. Өйткені, жарымжан жандардың көңілін табу – өте қиын шаруа. Оларға жан жылуын аямай, өз баласындай көріп, ерекше ынта-ықылас таныту керек. Осы қағиданы берік ұстаған Әсемкүл Ерғалиева өз ісіне сергек қарап, қарамағындағы жандарға жүрек жылуын аямай, жанашыр бола береді.
Мейрамбек
ШІЛДЕБАЙҰЛЫ.
Сырдария ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
