Ап-ауыр оттегі баллонын арқалап ауруханаларды жағалаған бір топ жігітті көргенде «әп, бәрекелді!» дейсің. Елдің басына түскен қиындықты көтеруге иығын тосқан, өз уақытын аямай, еріктілер қатарына қосылған белсенді жастар бұлар. Солардың бірі – Рахымжан Мұсатай.
– Бұл – қоғам мүшесі ретіндегі міндетім. Мұндай қиын сәтте барлығымыз жұмылып, індетпен күреспесек, кейін «патриотпын, елімді сүйемін» деп айтқанның бәрі сенімсіз болады. Қуатты елдің ұландарының қандай екенін көрсеткім келеді, – дейді Рахымжан.
Еріктілер қатарында ол секілді ондаған, тіпті жүздеген жас бар. Олар 90 келілік оттегі баллонын арқалап, қажетті емдеу орнына жеткізіп жүр. Кейде санитарлық талап бойынша оларды таситын автобустарды аурухана алаңына кіргізбейді. Амал жоқ, талапқа бағынбаса да болмайды.
– Бізде Whatsapp желісінде еріктілерге арналған топ құрылған. Қай ауруханаға қанша баллон керегін сол жерде жазып отырады. Біз тапсырысты қабылдаймыз да тартып отырамыз. Бір күнде 15-20 баллонға дейін тасимыз. Оны толтырудың өзі қиындады. Мәселен, кеше «Квант» мекемесінде түгесіліп қалыпты, басқа бір жерге сілтеді. Ол жаққа барғанда да оп-оңай қолға түспеді. Елуінші болып кезекке тұрдық, – дейді ерікті жас.
Олар бүгінге дейін облыс орталығындағы барлық ауруханаларға баллон жеткізді. Қиындығы сол – уақыт тығыз, баллон қолыңды күйдірер ыстық. Техник-электрик мамандығын алған жаңақорғандық Рахымжан облыстық жастар ресурстық орталығында жұмыс істейді. Қазір барлық сақтық шараларын ұстана отырып, еріктілердің алғы шебінде жүр.
«Квант» ЖШС мекемесінен орталық автобусымен ауруханаларға оттегі баллондарын жеткізуге жұмылған жастардың ісіне сүйсінесің. Облыстық жұқпалы аурулар, темір жол, фтизиопульмонологиялық аурухана және Қорқыт ата атындағы ҚМУ жатақханасындағы провизорлық стационар арасында шапқылап жүрген жігіттер еңбектері қайтып, жуық арада науқастардың барлығы жазылып шығатынына сенеді. Біз де сенеміз.
Дәулет ҚЫРДАН,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
