Ақындар арасында ерекше болмыс-бітімімен, әулие-әмбиелігімен аты аңызға айналған, қызу еңбектің қазанын қайнатып, сан өнердің отын маздатқан халық ақыны Манап Көкеновке елдің қошемет-құрметі жоғалған емес. Мұны ақынның атындағы жүлде үшін достық кездесу айтысына алыс-жақыннан жеткен ақындардың шабытынан анық аңғардық.
Қазақтың елдігі мен ерлігін, кемеңгерлігі мен көсемдігін, тереңдігі мен кеңдігін сөзге сыйғызған, бітпес даудың, бәтуасыз шудың кесімі сөз деп ұққан ақынның ізінен ерген айтыскер қауым Қаратау бөктеріне жиналды. Тамаша табиғат аясында табысқан ақындардың қуанышында шек жоқ. Көпшіліктіңде аламан айтысты сағынып қалғаны сезіледі. Хан баласындай нық, би баласындай тік сөйлейтін айтыскер ақындардың мектебінен тәлім алып, сөз шеберлігін қалыптастырған жас буын өкілдері сахна төріне көтерілді. Бұрынғы айтыстан өзгешелігі, Арқа төсінен қос бірдей ақын қатысып, кең-байтақ дала ұландарының арасында өз өңірінің абыройы үшін тартысқа түсті. Керекулік Бөкен Жігер мен Ербақ Құрметжанның екпініне тойтарыс беруге жаңақорғандық ақын Азамат Тәуекел мен Айбек Шекербек, түркістандық Нұрдәулет Өмірбеков пен Аман Рахат сөзден маржан тізді.
Алғашқы сөз сайысы Бөкен Жігер мен Азамат Тәуекелдің арасында өтті. «Батасын алайын деп баталы елдің, Бойыма бар өнерді жиып келдім» деп өлеңін бастаған Бөкен Жігерде расында жігітке тән жеті өнер бар. Қорқыт еліне қобызбен келіп қарсыласына бірнеше соққы берді. «Алыстан ат терлетіп жеткенімде, айтысқа екі-ақ ақын келгені не?» деп қалжыңмен қағытып өтті. Сырдың сұлу табиғатын сөзбен өрнектеп, тарихи тұлғалар жайлы көп білетінін аңғартты. Манап ақынның таң атырып айтысқан сәттерін қозғап, «Таң бозарған сәтке дейін сөз айтайық, Тамаша тарихи сәт қайталанып» деп желкілдеді. Ә дегеннен сөзі сүйектен өтіп, жүрекке жеткен керекулік ақыннан соң жаңақорғандық Азамат Тәуекел «Қонағым тым зорығып қалмасын деп, жекпе-жекке қос ақын ала келдім» деп қарымтасын берді. Сонан соң, бойдақтығын алға тартып, «мен егер солтүстікке бара қалсам, тым жақсы баспана берер ме едің? Сол жақтан шалақазақ бір қыз алып, мәңгі бақытты болар едім» деп достық әзілді орынды айтты. Алғашқы жұптың арасындағы тартыс бауырластықпен бекіді деуге болады.
Солтүстікке көшу бағдарламасымен оңтүстіктен қоныс аударған ақын Ербақ Құрметжан ыстық мекенге табан тіреп, өнерін көрсетіп отырғанын тебіреніспен жеткізді. Кең-байтақ еліміздің қай тұсы болмасын жатсынбайтынын өлеңіне қосты. Жасыратыны жоқ, ақын көптің алдына шыққанда сәл кібіртіктеп, сөзден жаңылысулар жиі болды. Мұны ол көптен бері айтыс сахнасына шықпай жүргенімен де байланыстырды. Қарсыласы түркістандық Нұрдәулет Өмірбеков «Айтысты сонша күттіріп қойдыңыздар, сұлу қызбен жұп қылып қойғандайын» деп белгіленген уақыттан кеш басталғанын әзілге айналдырды.
Түркістандық Рахат Аманның суырыпсалмалығына тәнті болған көпшіліктің қиқуы көбейді. Табан астынан сөз саптап, төгілдіре жыр арнаған жас бала әп-сәтте болған жағдайларды сөзге ілді. Орындыққа жайғаса бере қыздардан шай сұраған жаңақорғандық Айбек Шекербектің қылығын күлкіге айналдырып, елдің езуін жиғызбады.
Павлодар облысы Успенка ауданының мәдениет, тілдерді дамыту және спорт бөлімінің басшысы Медет Тауасқан екі шалғай облыстың арасында мәдени-рухани қарым-қатынас саяси-экономикалық бағытта байланыс құруға жол ашатынын сөз етті. Жаңақорған ауданы әкімінің орынбасары Дархан Есалыұлы айтыстың жоғары деңгейде ұйымдастырылғанын жеткізді. Халық ақыны Манап Көкеновтің әулетінен сөз алған Құттықожа Көкенов ақ батасын берді. Ал Убайдулла Манапұлы әкесінің атындағы жүлде жыл сайын өткізілетінін, осы айтысқа демеуші болған азаматтарға риясыз тілегін жеткізді.
Мақпал МАРҚАБАЙ,
журналист
>>> Біздің Facebook, Instagram парақшаларымыз бен Telegram каналымызға жазылыңыз! <<<