Сырдария – облыстағы ауыз сумен толық қамтамасыз етілген бірден-бір аудан. Ауданда барлық салада ілгерілеу бар. Өнеркәсіп кәсіпорындарында өнім өндіру көлемі ұлғайған. Өткен жылы аудан экономикасына 36 млрд теңге инвестиция тартылған. Бұл туралы өңірлік коммуникациялар қызметінде өткен брифингте аудан әкімі Талғат Дүйсебаев айтып берді.
Аудан бюджеті өсіп, салық түсімдері артығымен орындалуда. Өнеркәсіп саласында оң динамика қалыптасқан.
Мәліметтерге сүйенсек, ауыл шаруашылығының өнім көлемі 16,3 млрд теңгені құрап, 1,8 процентке артқан. Карантиндік шектеулер мен су тапшылығына қарамастан диқандар 21 мың гектарға күріш егіп, 63,5 центнерден өнім жинады. Енді шаруалар суды аз қажет ететін майлы дақылдар, көкөніс-бақша және мал азығы дақылдарын егуді қолға алмақ. Ауданға қарасты бірқатар ауылдың каналдары тазартылып, аяқсу мәселесі шешімін тапты. Алдағы бес жылда 60 гектар жерге 84 мың түп ағаш егу жоспарланып отыр.
Әртараптандыру үшін аудандық бюджеттен қаржы қаралып, Тереңөзек кенті А.Тоқмағанбетов және Қоғалыкөл ауылынан 18,5 гектар жер учаскесі аграрлық-индустриалдық аймақ болып белгіленді. Іңкәрдарияда 10 гектар жерге заманауи технологияларды пайдаланып, бақша дақылдарының тұқымын өндіру мен өсіру ісі жүзеге асырылмақ.
Ауданда мал басы көбейген. Өткен жылы 3924 тонна ет, 6963 тонна сүт және 185,4 мың дана жұмыртқа өндірілген. «Сыбаға», «Агробизнес», «Іскер» бағдарламасы арқылы шаруалар төрт түлігін түлетті. Бесарықтағы «Абай Дәулет» серіктестігі уақ мал басын көбейту алаңын іске қосты. Ісін бастаған кәсіпкерлер саны артқан. Жаппай кәсіпкерлікті дамыту аясында мемлекеттік бағдарламалар арқылы 538 жоба құпталып, 540 жаңа жұмыс орны құрылған.
«Ақжарма-2» шаруа қожалығы «күріш ақтап, тазалайтын және кіші пастерленген сүт зауыттарын іске қосу, жылыжай және бау-бақша сақтайтын қойма салу», Тереңөзек кентінде «Аққұм Жер» серіктестігі «Ұн зауыты» жобасын іске асыруда.
Ауданда соңғы жылдары тұрғын үй салуда айтарлықтай жетістік бар. Биыл мемлекет есебінен 81 отбасы баспаналы болмақ. Тереңөзек кентіндегі жаңа шағын ауданға «Нұрлы жер» бағдарламасы бойынша электр мен ауыз су желісі тартылды. Жол желісін дамыту, елді мекен көшелерін жөндеу жұмыстары жалғасып келеді. Нәтижесінде ішкі жолдардың 83 проценті асфальтталды.
Дегенмен, мәселе де жоқ емес. Ауданға қарасты елді мекендердің электр желілерінің 70 проценті тозған. Әсіресе, Аманкелді, Шаған, Қоғалыкөл және А.Тоқмағанбетов ауылдары электр энергиясынан жиі ажырауда. Қазір мәселенің шешімін табу мақсатында тиісті жұмыстар қолға алынған.
Аудан халқы «көгілдір отынның» да игілігін көре бастады. Тереңөзек кентінің кварталішілік газ құбырлары желісінің құрылысы аяқталып, табиғи газға қосылды. Ендігі кезекте А.Тоқмағанбетов, Қалжан ахун, С.Сейфуллин, Шаған елді мекені тұр. Бұл бағыттағы жұмыстар кезең-кезеңімен атқарылатын болады.
Аудан әкімі «Еңбек» бағдарламасының нәтижесі, жұмыспен қамтылғандар, мемлекеттік жәрдемақы алатындар және мүмкіндігі шектеулі азаматтарға жасалып жатқан шаралар мен «Дипломмен – ауылға» бағдарламасының жемісі туралы баяндады. Білім саласында да айтарлықтай өзгеріс бар. Пандемияға байланысты оқушылар онлайн форматта білім алды. Қазір аудандағы 17 мектепте 8232 оқушы бар. Білім беру ұйымдары түгелдей интернет желісіне қосылған.
Брифингте медицина, мәдениет, спорт, мемлекеттік жастар саясатының жүзеге асырылуы жайында атқарылып жатқан жұмыстар да айтылды. Аудан басшысы алға межеленген жоспарларды да тарқатты.
Сара АДАЙБАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
