Алдымызда екі үлкен мереке келе жатыр: біріншісі 30 тамыз – Конституция күні және 16 желтоқсанда Тәуелсіздігімізге 30 жыл толады. Бүгін Қызылорда қаласында Тәуелсіздігіміздің 30 жылдығына байланысты облыстық деңгейде үлкен шара өткізіліп жатыр. Қоғамдық, экономикалық,әлеуметтік, мәдени барлық қарым-қатынастарды реттейтін бір-ақ заң бар, ол – Конституция.
Біз Конституцияның аясында өмір сүріп келе жатырмыз. Қалған заңдар барлығы осы заңнан таралады. Барлық елдің Конституциясы бар, заңдарды сынаушылар да жоқ емес. Алайда осы Конституция аясында біз халыққа үлкен мүмкіншіліктер жасай аламыз. Ата Заң қабылданып, билік тармақтарының бәрін шегендеп, бағамдап бергенінің өзі мемлекетіміздің дамуына зор ықпалын тигізді.
Тәуелсіздіктің 30 жылдығы бізге не берді? 19 миллион халық одан не ала алады? Кеңес Одағында өмір сүрген халқымызда алға басушылық бар ма? Сараптап келген кезде біздің қоғам экономикалық, әлеуметтік, саяси жағынан бірнеше мыңдаған шақырым алға жылжыды. Тәуелсіздік алғалы ең үлкен шаралардың бірі – ол мемлекетіміздің ішкі және сыртқы дамуына ие болуы. Ата Заңды бекітіп, ешбір елмен соғыстық жағдайларға жеткізбей шекарамызды шегендеп алдық.
Әлемдік дамуда ең жақсы жол ол – нарықтық қатынас. Біз нарықтық қатынасқа түскен мемлекетпіз. Әлемдегі дамыған мемлекеттер бәсекелестік, даму мен сұраныс, ұсыныстың аясында дамиды. Сондықтан Орталық Азия мемлекеттер арасында ең алғашқы болып 1992 жылдан бері нарықтық қатынасқа еніп, қазірде Қазақстан толықтай нарықтық қатынасқа енген мемлекет деп бүкіл әлем мойындайды.
Қазақстанды бүкіл дүние жүзі мойындайды, біз әлемдік қауымдастықтың бір пұшпағы, субъекция ретінде өмір сүреміз. Әлем мойындау дегеніміз бұл – Қазақстанның дербес мемлекет болуы.
Ұрпаққа біткен үлкен бақыт – Тәуелсіз ел болу. Тәуелсіздігіміз тұғырлы болсын! Аға ұрпақтың Тәуелсіздікті тұрақтылықта, татулықта келер ұрпаққа табыстауы – біздің міндетіміз.
Мен Тәуелсіз Қазақстаныммен мақтанамын!
Мұрат Бақтиярұлы,
ҚР Парламенті
Сенатының депутаты
>>> Біздің Facebook, Instagram парақшаларымыз бен Telegram каналымызға жазылыңыз! <<<