Ертеңгі күннің бүгінгі күннен асып түсуіне ықпал етіп, адамзат қоғамын алға қарай жетелеуші құдіретті күш тек білімге ғана тіреледі. Заман талабы тұрғысынан жеке тұлғаны дамытудағы қоғамның рухани және адамгершілік құндылықтарын қалыптастыруда білім беру саласы – баса назар аударарлық мәселе.
Қазақстан Республикасының Тұңғыш Президенті – Елбасы Н.Назарбаев: «Білім берудің сапасын жаңарту мен әлемдік білім стандартына сәйкес ұлттық білім беру жүйесін құру қажет» деп атап көрсеткен. Расында ХХІ ғасырда Қазақстанның білім беру жүйесіндегі жалпы және орта білім беру жүйесіне өзгеріс енгізу уақыт талабы болып отыр. Қоғамымыздың әлеуметтік-экономикалық және саяси құрылымының түпкілікті жаңаруына байланысты бірінші міндет халықтық білім жүйесін жаңаша тұжырымдама жасап, жаңаша талап қоюды қажет етеді.
Әсіресе ауылдық жердегі мектептер мен қала мектептері арасындағы білім берудегі және оның нәтижесіндегі алшақтықты шешудің жолы басты назардағы мәселелердің біріне айналды. Мемлекеттің басты назарындағы бұл мәселені шешу аясында Қазақстан Республикасының Президенті Қасым-Жомарт Тоқаев Қазақстан халқына Жолдауында: «Қала мен ауыл мектептері арасындағы орта білім сапасы алшақтап барады. Негізгі мәселе – ауылдық жерлердегі білікті педагог кадрлардың тапшылығы. Сондықтан, «Дипломмен – ауылға!» бағдарламасының аясын кеңейтіп, жұмысты жаңа деңгейде жалғастыруымыз қажет. Үкіметке келесі жылдан бастап осы бағдарламаны қаржыландыруды 20 миллиард теңгеге жеткізуді тапсырамын. Дарынды ауыл жастарын іріктеп, отандық және шетелдік жоғары оқу орындарына дайындау керек. Аз қамтылған және көпбалалы отбасыларды қолдау үшін Үкіметке дарынды баланың қабілетін дамытудың жол картасын әзірлеуді тапсырамын» деп, өзге де басымдық беруге тиісті міндеттерді атап көрсеткен. Соның нәтижесінде қала мен ауыл мектептері арасында орта білім сапасындағы алшақтық пен маман жетіспеушілігі шешімін тауып, жүйелі жұмыстар атқарылып келеді. Биыл мектеп бітірген түлектердің қатарында 15 оқушы мемлекеттік грант иегері атанып, аудандағы алдыңғы қатарлы мектептермен бірдей деңгейде нәтиже көрсетті.
Ұстаздар қауымы жүйелі жұмысты әрі қарай жалғастыруды әркез мақсат етеді. Сондықтан мектептердегі нақты міндеттердің бірі білім беру кезеңінде балалардың физиологиялық, психологиялық деңгейінің дамуын, әр салада болсын біліктіліктерін жетілдіруі ұстаздардың және білім орындарының басты міндеті болып қала бермек.
Гүлсім ТӨЛЕГЕНОВА,
Е.Көшербаев атындағы №57 орта мектептің мұғалімі.
Арал ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
