Өткен жылы «Нәтижелі жұмыспен қамту және жаппай кәсіпкерлікті дамыту» бағдарламасына қатысып, облыстық кәсіпкерлер палатасының қолдауымен «Бастау-Бизнес» курсында білімін жетілдірген Қармақшы ауданына қарасты Ақай ауылының жас кәсіпкері Қосым Жұмағалиевтің есімі бүгінде ауылдастарына жақсы таныс.
Алғашқы кезде есік шығаратын цех ашу ойымен «Атамекен» Ұлттық кәсіпкерлік палатасының Байқоңыр қалалық бөліміне барған. Қосымға бөлім маманы Нұргүл Мәжиева көне жиһаздарды өңдеп, жаңарту кәсібін бастаса нәтижеге қол жеткізуге болатыны туралы кеңес береді.
Сол жылы «Бастау-Бизнес» курсында білімін жетілдіріп, қорғаған жобасы арқылы алған несиеге арнайы жиһаз жасайтын құралмен жабдықталған шағын цех ашты.
Бүгінде Қосымның жиһаз цехында үш маман тұтынушылар тапсырысын сапалы әрі уақытылы орындап, тұрғындарға қолжетімді бағамен ұсынуда.
Тағы бір айта кетерлік жайт, Қосым жуырда зайыбы Ақниетпен отбасылық кәсібін әрі қарай дамыту мақсатында мемлекеттік бағдарлама арқылы екінші рет грантқа ие болды.
– Тұтынушылар тарапынан жиһазға тапсырыс алған соң, әрине, оған қажетті құралдарды, яғни, жиһазға қажетті тұтқа, топса, шеге сияқты ұсақ-түйектердің бәрінің сапасына қарай таңдаймыз. Үстел, шағын шкаф пен үй бұйымдарын сапасына қарай бағалаймыз. Халықтың заманауи үлгідегі үй жиһаздарына сұранысы жоғары, – дейді шебер.
Ұнатқан кәсібіңді тіршілік көзіне айналдырып, халықтың алғысына бөленген қандай бақыт!
Нұрбай ЖАНӘДІЛОВ.
Қармақшы ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
