Бұл – желіде көркімен тамсандырып, «Қызылорда аруы – 2017» атанған Гүлнұр Нұртазаға жұртшылық қалдырып жатқан пікірлердің түйіні. Бірер апта бұрын бойжеткеннің дәмханалардың бірінде ыдыс жуып жүрген бейнежазбасы тараған болатын. «Қазнетте» көп талқыланған бейнежазбадан соң Гүлнұр жайлы отандық БАҚ жарыса жазды. Жақында ресейлік танымал тележүргізуші Ксения Собчак жерлесімізге «Бірінші арнадағы» бағдарламаның кейіпкері болуды ұсынды. Алайда, ұзақ келіссөздерден кейін Гүлнұр шақыртудан бас тартқан. Оның өзіндік себебі бар.
– Негізінен бұған дейін модельдік агенттікте, сән көрсетілімдерінде жұмыс істедім. Әлемді жайлаған індет әсерінен ол жақтағы жұмыс тоқтап қалды. Отбасымда жалғыз қызбын. Әкем 15 жасымда жүрек ауруынан қайтыс болды, анам былтыр қыркүйекте коронавирустан көз жұмды. Туыстарыммен жақын араласпаймын, ешкімге масыл болғым келмейді. Сонымен пәтерақым, күнделікті жолым мен тамағыма ақша табу керек болды. Одан бөлек, оқуға төлейтін ақша жинап жатқан едім. Алматыдағы университеттердің бірінде сырттай экономист мамандығы бойынша оқимын. Оқу ақысы – 700 мың теңге. Дәмханада ыдыс жуып, бас аспазға көмектескенім үшін күніне жеткілікті жалақы аламын. Дәмханада істейтін досым видеоны ортақ таныстарымыз бар чатқа жіберген екен. Әрі қарай оны желіге кім салып жібергені белгісіз. Бір күн ішінде қарапайым видео өмірімді өзгертті, қолдау танытқандар, «хайп қуып жүр» деп пікір білдіріп жатқандар бар. Ресейлік БАҚ назар аударып, бағдарламаға қатысуға шақырды. Бағдарлама менеджері маған ұшу, қонақ үйде тұру ақысын төлейтіндіктерін, қомақты қаражат беретіндерін айтты. Үлкен мүмкіндік туды деп ойладым, сондықтан бастапқыда келістім. Алайда, бағдарлама сценарийін, сұрақтарды қарау барысында бір-екі мәселе туындады. Олардың Қазақстандағы сән саласына салыстырмалы түрде қарауы, негативті пікірлер айтылатыны көңілімнен шықпады. Арзан шоуға айналдырып, «Қараңыздар, Қазақстанда осындай қыздың жағдайына ешкім қарамайды» дегенді айтып, ресейлік арулар конкурсының жеңімпаздарымен мені салыстырғысы келетін емеурін байқадым. Сондықтан келісімді бұзуыма тура келді, – дейді Гүлнұр.
Шынында, бұл – қарапайым бейнежазба, қыз баласының күнделікті үй шаруасындағы жұмысы. Бірақ, мұндағы мәселе әсемдік байқауында топ жарған бойжеткеннің подиумды бір кез дәмханаға алмастырғанында болып тұр. Оған кейіпкеріміз мынадай жауап қатты.
– Осындай байқауларда топ жарған сұлулардың енді өмірі өзгереді, жұлдызы жанды, ақсаусақ, өзіндік пікірі қалыптаспаған деген мін тағылып, қатты сөздер де айтылып жатады. Бірақ, әр адам әртүрлі. Отбасында тәлімді тәрбие алған, құндылықтары қалыптасқан, арманына өз күшімен жетуді ойлайтын қыздар көп. Өмірдің барлығы біз әлеуметтік желіге жүктеген көңілді сәттеріміздегідей емес. Бірде құлаймыз, бірде қайта тұрып, мақсаттарымызға ұмтыламыз. Менде де солай. Бірақ, қоғамда түрлі пікірдің болуы заңды, – дейді ол.
Әлеуметтік желіде кеңінен тараған бейнежазбадан соң кейбір алаяқтар Гүлнұрдың атынан фейк парақша ашып, көптен көмек те сұраған. Мұны көргеннен кейін Гүлнұр өзінің ресми парақшасын қайта іске қосқанын, онда хабарлама қалдырып, көмек қолын созсам деген жандар көп екенін айтады. «Бүгінгі таңда жеке шотыма 200 мың теңге қаражат жиналды. Біреулер 100, енді біреулер 300 теңгеден жіберіп жатыр. Оны оқуыма жұмсаймын. Мәселе ақшада емес, ниетте. Маған қолдау білдіріп жатқан әрбір жанға алғыс білдіремін. Мен осы жайттан кейін айналамызда көмек қолын созуға асық ақжүрек жандардың көптігін байқадым. Материалдық емес, адами құндылық маңызды әрқашан» деді ол әңгіме соңында.
Мөлдір ҚАЛЫМБЕТ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
