Мемлекет басшысының 2025 жылды «Жұмысшы мамандықтар жылы» деп жариялауы еліміздің экономикалық және әлеуметтік дамуына серпін беретін маңызды қадам болды. Себебі, бұл бастама кәсіптік білім беретін оқу орындарының алдына жаңа міндеттер қойып, сала жұмысына қатысты өзекті мәселелердің шешімін табуына жол ашты.
Осындай байыпты бастамаларға негізделген іс-шараның бірін атап өтсек, М.Ықсанов атындағы Қызылорда техникалық-ІТ жоғары колледжі базасында «Білікті маман – жарқын болашақ кепілі» тақырыбында облыстық семинар өтті. Онда техникалық және кәсіптік білім беру ұйымдары педагогтері арасында білім алушылардың икемді дағдыларын дамытуға байланысты озық тәжірибелерді ұсыну арқылы өзара тәжірибе алмасу, колледж бен жұмыс берушілер арасындағы ынтымақтасты одан әрі нығайту бағытындағы мәселелер талқыланды.
Жиынға оқу орны мен мамандарды даярлау ісінде әріптес өнеркәсіптік мекеме өкілдері, техникалық және кәсіптік білім беру ұйымдары басшылары, БАҚ өкілдері қатысты.
Семинарға келушілерге алдымен оқу орнында жұмыс жасайтын «Бизнес стартап», «Мансап орталығының» жұмысы таныстырылды. Айталық, «Бизнес стартап» орталығында колледж түлектерінің кәсіпкерлік жобаларына бағыт-бағдар беріліп, құқықтық, заңнамалық тұрғыда көмек көрсетіледі. Ал «Мансап орталығының» негізгі жұмыс бағыты оқу орнын бітіруші түлектерді «Еңбек KZ» порталына тіркеп, бос жұмыс орындары жәрмеңкесіне қатысуына қолдау көрсетіледі. Сондай-ақ білім алушылардың тәжірибеден өтетін базалық мекемелер аясын кеңейту, дуальдық оқытудағы мамандықтарға әлеуметтік серіктестер табу, түлектерге мамандық таңдауда бағыт-бағдар беріп, соған сәйкес семинар, тренинг сияқты қажетті іс-шараларды ұйымдастырады.
Осы ретте М.Ықсанов атындағы Қызылорда техникалық-ІТ жоғары колледжі мен облыстық кәсіпкерлер палатасы, облыстық жұмыспен қамтуды үйлестіру және әлеуметтік бағдарламалар басқармасының «Еңбек мобильділігі орталығы» мекемесі арасында меморандумға қол қойылды. Айта кетейік, аталған келісім арқылы колледж түлектерінің бизнес бағытында әзірлеген жобалары өзара талқыланып, қажет болған жағдайда қолдау көрсету қарастырылған.
«Көлік жөндеу» құзыреттік орталығы, жаңа үлгідегі оқу-жаттығу құрал-жабдықтары мен оқу орны автодром жұмысы таныстырылып, алдағы атқарылатын жобалар жайында сөз болды. Сондай-ақ семинарға қатысушылар арнайы көлікпен оқу орнының әріптес мекеме базаларын аралап, «Hyundai Avto Kyzylorda» ЖШС жеңіл автокөліктерді жөндеу орталығы, «Хан» ЖШС темір бұйымдарын дайындау цехы сияқты колледж білім алушыларының өндірістік тәжірибеден өтетін орындарының жұмысымен танысты.
Семинардың екінші бөлімінде М.Ықсанов атындағы Қызылорда техникалық-ІТ жоғары колледжі директоры Бектұр Қали, облыстық кәсіпкерлер палатасының директоры Пірмұхаммед Сыздық, облыстық жұмыспен қамтуды үйлестіру және әлеуметтік бағдарламалар басқармасының «Еңбек мобильділігі орталығы» директорының мемлекеттік қызметтерді көрсету бойынша орынбасары Ақерке Ахметова баяндама жасап, оқу орнымен әріптестік аясында бүгінге дейін атқарылып келе жатқан жұмыстардың нәтижесін ортаға салды.
Жиынға арнайы шақырылған «Өрлеу» БАҰО АҚ филиалы Қызылорда облысы бойынша кәсіби даму институты, «Respublica» партиясы Қызылорда облыстық филиалы, «Venera Print» жарнама агенттігі өкілдері сөз кезегінде оқу орнымен өзара әріптестік аясындағы жұмыстардың қазіргі көрсеткіштеріне тоқталып, бұл орайда жас мамандардың тәжірибеден өтуіне қолдау көрсету жобасы әрі қарай да жалғасын табатынын атап өтті.
Жиын қорытындысында оқу орны және жұмыс берушілер тарапынан бірлесіп атқарылған жұмыстардың нәтижесі қаншалықты деген сауалға келсек, бүгінде колледж бітірушілерінің 70 пайызы тұрақты жұмыспен қамтылған.
Семинар аясында жоғарыда атап өткеніміздей, оқу орнымен арадағы өзара келісім-шарт талаптарына сай жүйелі жұмыс атқарып келе жатқан әлеуметтік әріптес мекеме басшыларына облыстық білім басқармасы тарапынан марапаттар табысталды.
Ғазиза ӘБІЛДА,
«Сыр бойы»
