Біз Елбасымыздың әрбір Жолдауын болашаққа деген сеніммен, қуанышпен асыға тыңдаймыз. Тәуелсіздік алған жылдардан бері көп жұмыс атқарылып, Мемлекет басшысының сарабдал саясатының арқасында еліміз қарқынды дамып келеді. Экономиканы өркендетудің негізі саналатын шағын және орта бизнес алға басуда. Соңғы кездері әлемдік саяси және экономикалық трансформация үдерістері күшейе түскенін осы мәселеге қатты назар аударылғанынан аңғарамыз. Қазақстандықтардың әл-ауқаты, ең алдымен, табыстарының тұрақты өсімі мен тұрмыс сапасына байланысты деп атап өтілді Жолдауда.
Адам еңбекқор болып, өз кәсібін жақсы меңгергенде және лайықты жалақы алуға немесе жеке кәсіп ашып, оны дамытуға мүмкіндік болған кезде табыс артады. Мемлекет пен адамдардың күш біріктіруінің арқасында ғана біз жалпыға ортақ еңбек қоғамын құра аламыз деп нақтылап айтты.
Елбасы Н.Ә.Назарбаев өзінің халыққа үндеген әр сөзінде халықты еңбекқорлыққа, адалдыққа, ауызбіршілік пен білімділікке шақырады. Бюджеттік мекемелерде жұмыс істейтін 275 мың қызметкердің еңбекақысы көбейіп, орта есеппен 35 пайызға өседі. Осы мақсаттарға 2019-2021 жылдарда республикалық бюджеттен жыл сайын 96 млрд теңге бөлу керек деп тапсырма берілді. Елбасы бұл мәселеге ерекше көңіл бөлді. Мемлекеттің қалыптасуына бағдарланған қажетті бастамалар жасалды. Олардың жүзеге асырылуы табысты дамуымыздың негізгі факторына айналды. Біздің стратегиялық мақсатымыз – 2050 жылға қарай әлемдегі озық дамыған 30 елдің қатарына қосылу. Үш жыл бұрынғы «100 нақты қадам» – Ұлт жоспарының жариялануының өзі ұлттың жаңа қарқынды сеніммен қадам басуына міндеттелген. Осыдан кейін еліміздің Үшінші жаңғыруына назар аударылды, оның басты міндеті – Қазақстанның жаһандық бәсекеге қабілеттілігін қамтамасыз ететін экономикалық өсімнің жаңа моделін құру. Бұл еліміздің қарқынды дамуы, өмір сүру деңгейін одан әрі арттыруға деген зор сенім еді. Жаңа Жолдау негізінде біз жаңа міндеттерді атқаруға дайынбыз.
Адамның өмір сүру сапасын жақсарту үшін, алдымен медициналық қызмет сапасы халықтың әлеуметтік көңіл-күйінің аса маңызды компоненті болып саналады. 2019 жылдың 1 қаңтарынан бастап барлық емханалар мен ауруханалар медициналық құжаттарды қағазсыз, цифрлық нұсқада жүргізуге көшуі тиіс екендігін міндеттеді. Бұл 2020 жылға қарай бүкіл тұрғындардың электронды денсаулық паспорттарын жасауға, кезектерді, бюрократияны жоюға, қызмет көрсету сапасын арттыруға мүмкіндік береді. Білім берудің, денсаулық сақтау саласының, тұрғын үйдің сапасы мен қолжетімділігі, жайлы және қауіпсіз жағдайда өмір сүру мәселелері әрбір қазақстандық отбасына қатысты деп атап өтті. «Педагог мәртебесі туралы» заңды әзірлеп, қабылдау қажет деп тапсырды. Жоғары білім беру ісінде оқу орындарының маман дайындау сапасына қатысты талаптар күшейтілетінін назарға салды. «Ұстазы жақсының ұстанымы жақсы» деген, аталған міндеттерді орындайтын ұрпақ тәрбиесіне баса назар аударуымыз қажет.
Жайлылық дегеніміз – ең алдымен, тұрғын үйдің қолжетімділігі, ауланың әдемілігі мен қауіпсіздігі, тіршілікке және жұмыс істеуге қолайлы елді мекеннің және сапалы инфрақұрылымның болуы. Бақытты өмір сүру үшін, кез келген реформаны іске асыру барысында өзінің барлық іс-қимылын халықтың әл-ауқатын арттыруға арнайтын жинақы әрі тиімді мемлекеттік аппараттың маңыздылығында. Елбасы жаңа кезең жағдайында мемлекеттік аппарат қалай өзгеруге тиіс деген сұраққа жауап берді. «Сапа» – мемлекеттік қызметші өмірінің жаңа стилі, ал өзін-өзі жетілдіру – оның басты қағидаты болуға тиіс. Жаңа формацияның мемлекеттік қызметшілері мемлекет пен қоғам арасындағы алшақтықты қысқартуға тиіс деп атап өтті. Бұл арқылы тұрақты кері байланыс орнығып, мемлекеттік саясаттың нақты шаралары мен нәтижелері қызу талқыланып, жұртшылыққа түсіндіріледі. Мемлекеттік басқару академиясы Назарбаев Университетімен бірлесіп, «Жаңа формацияның басшысы» бағдарламасын және басшылық қызметтерге тағайындау кезінде арнайы қайта даярлаудан өткізетін курстар әзірлеу қажет екендігін айтты. Беделді жоғары оқу орындарын бітірген түлектерді қоса алғанда, біліктілігі жоғары кадрлардың жеке сектордан келуі 3 есе артып, Мемлекеттік қызмет істері агенттігінде орталық аппаратқа арналған конкурс бір орынға 28 адамға дейін, ал өңірлік құрылымдарда бір орынға 60 адамға дейін өскеніне тоқталды. Бұл көрсеткіштен біз қазір мемлекеттік қызметке қызығушылық артқанын және өңірлік деңгейде оның өзектілігі жоғарылығын аңғарамыз. Олар үнемделген қаражатты қызметшілердің жалақысын арттыруға бағыттау мүмкіндігін алды. Қазіргі уақытта көптеген мемлекеттік органдар жаңа модельге көшуді қалап отыр. Ең бастысы – олар мұны тек жалақыны көбейту ғана емес, бәрінен бұрын, жұмыстарының тиімділігін арттыру деп түсінуі қажет деп атап өтті. Еңбекке төленетін қаржының өсімі бюджет шығысын, соның ішінде бағынышты мекемелердің шығыстарын оңтайландыру және үнемдеу есебінен өтелуін бақылауда ұстау тапсырылды. Бұл жерде аталған жобаның беделін түсірмес үшін формализм мен теңгермешілікке жол бермеу қажет. Мемлекеттік қызметшілерге қойылатын талап әрқашанда жоғары екендігі назардан тыс қалған емес.
Әрине, Қазақстанның бағындыратын биіктері әлі алда. Осы Жолдау да сеніміміз бен рухымызды жігерлендіріп, бойымызға күш-қайрат дарытты. Сол сенімді ақтау әрбіріміз үшін өте маңызды.
Р.ЫСҚАҚОВА,
ҚР Президенті жанындағы Мемлекеттік басқару академиясының Қызылорда облысы бойынша филиалының директоры, облыстық мәслихат депутаты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
