Жуырда Жаңақорған ауданының құм беткейіндегі төрт ауылында жылқы қырылып, шаруаларға едәуір шығын алып келді. Кейіннен ол гастрофилез ауруы салдарынан туындағаны анықталды. Бұл диагноз ветеринариялық зертхана қорытындысы бойынша нақтыланды.
Осыған орай Жаңақорған ауданына қарасты М.Нәлібаев ауылында өткен семинарда тиісті сала басшылары, осы бағытта зерттеу жүргізген ғалымдар жергілікті шаруалармен жүздесіп, мәселенің мән-жайы тағы бір мәрте таразыланды.
Шара барысында аудан әкімі Руслан Рүстемов, облыстық ветеринария басқармасының басшысы Ерсұлтан Әпетов аталған мәселеге байланысты ой-пікірін білдірді. Басқарма басшысы мал ауруын зерттеп, қорытынды жасау мақсатында Қазақ ұлттық аграрлық университетінен ғалымдар шақырылғанын атап өтті. Алматыдан арнайы жеткен мамандар жылқының өлім-жітімі тіркелген Байкенже, М.Нәлібаев, Қожакент, Өзгент ауылдарында болды. Онда малдың шығынға ұшырауына байланысты себептерге назар аударылды.
Биология ғылымдарының кандидаты Гүлнази Ахметова паразитарлық аурудың зардабы, экономикалық зияны, жылқылардың арықтап кету себебі жөнінде кеңінен мағлұмат берді. Оның айтуынша, аталған ауруға ұшыраған жылқы малы 16-18 келіге дейін салмақтан айырылады. Сондай-ақ, инвазияның интенсивтілігі өте жоғары болса, личинка зардабынан жылқының асқазаны тесіледі. Сондықтан аурудың алдын алу мақсатында қора жайдың тазалығына мән берілгені дұрыс. Бұл ауруға мал иесі дәрі-дәрмек алып, жылына көктем және күз мезгілдерінде екі мәрте егуі керек. Қораларға дезинфекция жүргізілуі шарт.
Ветеринария ғылымдарының кандидаты Гүлнәр Тұрғанбаева ауырып тұрған жылқы малын сойғанда ащы және тоқ ішегінде көптеген гастрофилез және параскаридоз құрттары анықталғанын айтты. Бұл аурудың көбеюіне бөгелектің әсері болады. Мұндай жағдай жауын-шашын аз болған жылдары көбірек кездеседі. Оны ел ішінде қарынқұрт немесе көмейқұрт деп те атайды.
Семинар барысында осындай аурулардың алдын алу бағытында атқарылатын жұмыстар барысы сараланды. Шаруаларға өзге де мәселелер бойынша кеңес берілді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
