2025 жылдың 29 сәуірі күні 52 жастан асқан шағында белгілі қаржыгер-экономист, «Ерен еңбегі үшін» медалінің иегері, Жаңақорған және Шиелі аудандарының құрметті азаматы, Қызылорда облысының экономика және қаржы басқармасының басшысы Қамбарбек Мүбараков дүниеден озды.
Қамбарбек Амангелдіұлы 1973 жылы 2 наурызда Жаңақорған ауданы «Түгіскен» селосында дүниеге келген. 1990 жылы Жаңақорған ауданы «Өзгент» совхозында №224 орта мектепті бітірген. 1996 жылы Қызылорда Агроөнеркәсіп өндірісі инженерлері институтының АӨК экономист-менеджер мамандығы бойынша, 2005 жылы Қазақ Гуманитарлық Заң университетін заңгер мамандығы бойынша тәмамдаған.
Еңбек жолын 1990-1991 жылдар аралығында «Өзгент» совхозында қырманда слесарь болып бастаған. 1997 жылы қаңтар айынан мамыр айына дейін Қызылорда облысы бюджет банкінде инкассатор, 1997-2001 жылдар аралығында Қызылорда облысы бойынша салық комитетінде маман, бас маман, 2001-2002 жылдар аралығында Қызылорда облысы Шиелі ауданы бойынша салық комитетінде төраға орынбасары, 2002-2004 жылдары Қызылорда облысы Жаңақорған ауданы бойынша салық комитетінің төрағасы қызметін атқарған.
2004-2008 жылдары Қызылорда облысы бойынша салық комитеті төрағасының орынбасары, 2008-2009 жылдары Шиелі ауданы бойынша салық басқармасының бастығы, 2009-2011 жылдары Шиелі ауданы әкімінің орынбасары болды.
Одан кейін 2011-2018 жылдар аралығында Қызылорда облысы тексеру комиссиясының төрағасы, 2019-2020 жылдары Қызылорда облысының ауыл шаруашылығы басқармасының басшысы, 2020-2021 жылдар аралығында Шиелі ауданының әкімі, 2021-2022 жылдары Ы.Жақаев атындағы Қазақ күріш шаруашылығы ғылыми-зерттеу институтының басқарма төрағасы, 2022-2023 жылдары облыстық кәсіпкерлік және өнеркәсіп басқармасының басшысы қызметін атқарды.
2023 жылдың 19 мамырынан бастап өмірінің соңына дейін облыстық экономика және қаржы басқармасының басшысы болды.
Қамбарбек Мүбараков қандай қызметте де адал еңбегімен абыройға кенеліп, өңірдің салық, қаржы-экономика салаларының дамуына ерекше еңбек сіңірді.
Азаматтық ұстанымымен, іскерлігімен, мол тәжірибесімен көпке үлгі бола білген ардақты азамат атқарған қызметіне сай мемлекеттік марапаттарға ие болды.
«Қазақстан Республикасының Тәуелсіздігіне 10 жыл», «Қазақстан Республикасының Тәуелсіздігіне 25 жыл» мерекелік медалімен, «Үздік мемлекеттік қызметші», «Қаржы қызметінің үздігі» төсбелгісімен, «Ерен еңбегі үшін» медалімен марапатталды. Сондай-ақ «Қызылорда облысының дамуына қосқан үлесі үшін», Қазақстан халқы Ассамблеясының 30 жылдығы медальдарын иеленді. Жаңақорған және Шиелі аудандарының құрметті азаматы.
Мемлекеттік қызметтің түрлі сатысынан өткен тәжірибелі маман ретінде жас буынға ақылшы аға, отбасына қадірлі әке, дос-жаранға сыйлы замандас, қызметтестерге абыройлы әріптес бола білген Қамбарбек Амангелдіұлының жарқын бейнесі көптің жадында ұзақ уақыт сақталады.
Қызылорда облысының әкімдігі,
облыстық мәслихат,
«Amanat» партиясының облыстық филиалы,
облыстық Қоғамдық кеңес және облыстық Ардагерлер кеңесі
***
Марқұмды ақтық сапарға шығарып салуға байланысты қаралы жиын 30 сәуір күні сағат 12:30-да, намазы 13:00-де Жаңақорған кенті, С.Сапарбеков көшесі №154 үйде өтеді.
***
Жеті күндік асы 5 мамыр күні сағат 13.00-де Қызылорда қаласы, Бейбарыс сұлтан 14, «Ақмешіт-Сырдария» мешітінің асханасында беріледі.
***
Қырық күндік асы 7 маусым күні сағат 13.00-де Қызылорда қаласы, Бейбарыс сұлтан көшесі №21 мекен-жайында «Дария» мейрамханасында беріледі.
