Сахнада өнер көрсетудің өзіндік қызығы мен қиындығы қатар жүреді. Айталық, белгілі бір рөлді ойнап шығу міндеті жүктелгенімен актердің немесе актрисаның сол уақыттағы көңіл-күйі, жағдайы көпке беймәлім. Мысалы, ол дәл сол кезеңде жеке басына қатысты күрделі жағдайларды басынан кешіп жатуы мүмкін. Алайда театрдың жүктеген талабы бойынша ол көрермен алдына күліп шығуы керек. Жеке бастың мәселесі сахнаның сыртында, яғни баяу сырғыған перденің ар жағында қалуы тиіс.
Қызылорда музыкалық колледжін «Актерлік өнер» мамандығы бойынша бітіріп, еңбек жолын Н.Бекежанов атындағы қазақ академиялық музыкалық драма театрында бастаған Мейрамкүл Пұшпақова жиырма бес жылдан бері осынау өнер шаңырағында қызмет етіп келеді. Шығармашылық жолында сан алуан тақырыпты тарқатып, сан қырлы тағдырды суреттеді. Жай ғана суреттеген жоқ, кейіпкерінің болмысын, тұлғасын, табиғатын, ішкі толқынысын, жан айқайын жан-тәнімен жеткізуге тырысты.
Театр табалдырығын алғаш аттаған кезінде жас актрисаның бойында толқу мен қобалжу сезімдері болды. Бұл заңды да. Әйтсе де Ерғали Оразымбетов, Хұсейін Әмір-Темір сынды белгілі режиссерлердің тәлім, тәжірибесін алып, өнерін шыңдай түсті. Осындай үздіксіз шығармашылық ізденістері оның кәсіби шеберлігін қалыптастырды.
Мысалы, ол Д.Исабековтің «Мұңлық-Зарлық» лиро-эпостық драмасындағы Зарипа, А.Вампиловтың «Метранпаж» комедиясындағы Виктория, Л.Егембердиеваның «Көресіні көрмей» мелодрамасындағы Шәрипа, С.Ахмадтың «Келіндер көтерілісі» комедиясындағы Мехри, Р.Отарбаевтың «Қандыөзек» спектакліндегі Жалқытайдың анасы сынды рөлдерін сомдап, түрлі мінез иелерін тартымды бейнелей білді.
Иран-Ғайыптың «Қорқыт» драмасындағы Нике, С.Балғабаевтың «Ең әдемі келіншек» қойылымындағы Мәдина, У.Шекспирдің «Макбет» трагедиясындағы бірінші мыстан, А.Жапаровтың «Әйел тағдыры» драмасындағы Көпес, Қ.Мұхамеджановтың «Құдағи келіпті» комедиясындағы Айша, Х.Жүсіпұлының «Ешкімге керегі жоқ ауыл» драмасындағы Балымкүл, А.Елгезектің «Болмаған балалық шағындағы» Шынар образдары сәтті ашылып, көрермен көңілінен шықты.
Бұдан бөлек, шетел әдебиетінен сахналанған Т.Уфимцеваның «Ұйқыдағы ару» ертегісіндегі жауыз, Е.Шварцтың «Күлшеқыз» қойылымындағы Ханшайым, М.Задорновтың «Күйеуіңізді сатыңызшы» спектакліндегі Елена Владимировна, М.Омарованың «Шанель №5» деректі драмасындағы Гертруда Платайс, Л.Табукашвилидің «Арманымның ақ құсы» мелодрамасындағы Еленэ рөлдерінде актриса шынайы эмоция, нәзік сезіммен өрілген әйел тағдырының терең иірімдерін көрерменге әсерлі жеткізе білді.
Сахна шебері Мейрамкүл Керімбекқызының Сыр мәдениеті мен өнерінің өркендеуіне сіңірген еңбегі лайықты бағаланып, әр жылдары «Үздік әйел», «Ең үздік эпизодтық бейне» аталымдарын жеңіп алды. ҚР Мәдениет және спорт министрлігінің Құрмет грамотасымен, «Мәдениет саласының үздігі» төсбелгісімен, Қазақстан театр қайраткерлері одағының Құрмет грамотасымен марапатталды.
Әріптестерінің айтуынша, ол кәсіби шеберлігімен қатар, адамгершілік қасиетімен де театр ұжымына үлгі болып жүрген тұлға. Сахна мәдениетін терең меңгерген актриса әр кейіпкерін жан-жақты зерттеп, қойылым идеясын өмір шындығымен ұштастыра отырып, сәтті бейнелейді. Өнер иесі адалдық пен табандылықтың және кәсіби ізденістің жарқын үлгісіне айналды.
Тағы бір қызықты дерек, Мейрамкүл Керімбекқызы өмірлік жұбын осы сахнада жолықтырып, бүгінде берекелі отбасының ұйытқысы болып, өрімдей ұл-қыз тәрбиелеп отырған өнегелі жан.
Өзі ширек ғасыр еңбек етіп келе жатқан Н.Бекежанов атындағы қазақ академиялық музыкалық драма театрында сахна шебері Мейрамкүл Пұшпақованың мерейтойына орай «Сахнаның ерке елігі» атты салтанатты іс-шара өтті. Мерекелік жиында театр ардагері Хұсейін Әмір-Темір, театр директоры Мұхтар Ниязов, Жастар театры директорының орынбасары Бексұлтан Орынбасар бастаған әріптестері құттықтап, сый-құрмет көрсетті. Театр қайраткерлері одағының облыстағы өкілі Ұғым Баймаханов мерейтой иесіне «Дара» төсбелгісін табыстады.
Ғазиза ӘБІЛДА,
«Сыр бойы»
