1986 жылы құрылған «Арал-Сарбұлақ» су құбырын пайдалану басқармасы мемлекеттік коммуналдық кәсіпорнының 1985-1993 жылдар аралығында іске қосылған 345 шақырымды қамтитын «Бердікөл» және «Қосаман» су құбырының екі су тартқысындағы 12 су көтергіш сорап станцияларының, хлорлау қондырғыларының, 38 ұңғыманың бүгінгі күні Арал және Қазалы халқын ауызсумен қамтамасыз етіп отырғанын ел біледі.
«Арал-Сарбұлақ» топтық су құбырын пайдаланушы Қазалы өндірістік бөлімшесінде слесарь-жөндеуші болып он сегіз жылдан бері еңбек етіп келе жатқан Жақсылық Балмахановты бөлімше ұжымы сөзге сараң болса да, іске мығым, нағыз өз ісінің мықты маманы, жауапкершілігі мол, қатардағы қарапайым еңбек адамы ретінде түгел біледі десе артық болмас.
Әр адамның жаратылысы, өзіне ғана тән болады емес пе?! Әйтеке би кентінде туып-өсіп, орта білім алған Жақсылық өресіне сай келсе де, келмесе де шартарапқа шарқ ұрып арман қуғанды аңсап тұратын замандастары сияқты көңіл күйдің жетегіне ере кеткенді жөн көрмеді. Қазіргі еңбек етіп жүрген кәсіпорнының жай-күйінің қиыншылық кезеңіне қарамай, бөлімшеге слесарь-жөндеуші болып жұмысқа тұрды. Содан бері көзді ашып-жұмғанша өте шыққандай болған он сегіз жыл тәжірибе жинақтауға да, қалыптасуға да, бағытын айқындап тұрақтануына да жеткілікті болды.
Әрине, жыл мезгілдерінің аптап ыстығы мен қытымыр аязы, жаңбырлы маусым жұмыс барысына әсер ететіні рас. Дегенмен, таңдаған кәсібіңнің жауапкершілігі алдыңғы орында екенін естен шығармау керек. Насос станциялары және су жүйелері үшін бекітілген кестеге сәйкес алдын ала жөндеу жұмыстарын жүргізу, тұрғындарды сапалы ауызсумен қамтамасыз ету мақсатында ауызсу нысандарын жуып-шаю, залалсыздандыру жұмыстарын тәртіпке сай атқару, су жүйелері мен насос станцияларындағы апатты уақытылы әрі сапалы қалпына келтіру, апаттық жағдайларды уақытша қалпына келтіруге арналған құрал-жабдықтарды орнымен пайдалану – Жақсылықтың негізгі міндеттері. Кәсібін ерінбей-жалықпай адал атқаруға еті үйреніп кеткен.
Көп сөзге жоқ Жақсылық: Халықты ауызсумен қамтамасыз ету үшін қызмет жасап жүрген мамандардың еңбегі бағаланса, судың да сұрауы болатынын шынайы сезінсе, біздің еңбегіміздің қайтарымы сол болар еді» дейді.
Әлімжан ҚИЯС.
Қазалы ауданы
