Облыстық білім басқармасы басшысының міндетін атқарушы Бағдат Бердәулетовтің қатысуымен өңірдегі білім саласының ахуалы және алда тұрған ауқымды міндеттерін таразылаған жиын өтті. Онда білім саласында сапаны қамтамасыз ету департаментінің басшысы Ғалия Дәулетова хабарлама жасады.Нақты кезеңде аймақтағы 672 мектепке дейінгі білім беру ұйымының 72 процентін жекеменшік балабақшалар құрап отыр. Мұның тиімділігі сол – 3 пен 6 жас аралығындағы балалардың мектепке дейінгі білім берумен қамтылу деңгейі 100 процентті құрады. Ал жалпы орта білім беретін 293 мектепте 161 469 оқушы білім алуда. Биылғы оқу жылында 1450 оқушыға арналған 3 жеке мектеп ашылған.
Департамент басшысы Ғалия Ноғайқызы сала жұмыстарын саралай келе, облыстағы білім беру ұйымдары бойынша орыс сыныптарында мамандар жетіспеушілігі орын алып отырғанын айтты.
– Жыл сайын қаладағы білім беру ұйымдарында 20-ға жуық орыс тілінде білім беретін бастауыш сынып педагогтары жетіспейді. Орыс сыныптарында физика, химия, биология, математика пәндерінен зейнетке шыққан мұғалімдер сабақ беріп жүр. Әсіресе, ауыл мектептерінде орыс тілі пәні мамандарының жетіспеушілігі алаңдатады, – деді Ғ.Дәулетова.
Расында, мәселе – өзекті. Бұл орайда білім басқармасы мен Қорқыт ата атындағы ҚМУ бірлесіп, аталған пән мұғалімдерін дайындау мәселесін қолға алып отыр. Нәтижесінде, 2020–2021 оқу жылына педагогикалық мамандықтар бойынша 25 ректор грантын бөлу қарастырылған. Сонымен қатар, колледждерде орыс тілінде бастауыш сынып педагогтарын даярлау үшін жергілікті бюджеттен мемлекеттік тапсырыс бөлуге шешім қабылданған.
Бүгінде облыста 30 техникалық және кәсіптік білім беретін оқу орны бар. Оның 17-сі мемлекеттік, қалғаны мемлекеттік емес колледждер. Соңғы 5 жылда колледждердің материалдық-техникалық базасын заман талабына сай жабдықтауға, педагогтардың біліктілігін арттыруға жергілікті бюджеттен тиісті қаражат бөлінбеуіне байланысты аталған мәселені шешу жолдарын қарастыру ұсынылды. Сондай-ақ, WorldSkills қозғалысы басталғалы өңірдегі колледждердің жұмысын жандандыру қажеттігі айтылды.
Жиында «Педагог мәртебесі туралы» Заңның кейбір баптары кеңірек түсіндіріліп, журналистердің сауалдарына жауап берілді.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
