«Тұлға» айдарының кезекті кейіпкері – қармақшылық Мейрамкүл Нұржақыпова саналы ғұмырын ауыл шаруашылығына арнады. Оның ішінде трактор тізгіндеген жылдарын жылылықпен еске алады.
Ауданның бұрынғы Чапаев, қазіргі Ақтөбе елді мекенінде туып-өскен ол арман қуып, басқа қалаға кеткен жоқ. Қатарластарымен бірге ауылда қалып, тракторшы мамандығы бойынша алты айлық курс оқып бітірді. Қызыл дипломы бар қызды өз ауылы құшақ жая қабылдады. Бірден техника тізгінін ұстатып, егістік басына жіберді. Осылай басталған еңбек жолында кейіпкеріміз ауыртпалығы көп саланың қыр-сырын үйренді.
– Әуелі трактор, кейін комбайн жүргіздім. Күріш ектім. Тұрмысқа шыққан соң да осы жұмысты жалғастырдым. Өйткені балаларды марқұм енем бақты. Ол кісімен тұрған 37 жылда отбасылық қиындықтарды бірге еңсердік. Қазір, Аллаға шүкір, балалар өз алдарына бір-бір отау тікті, – дейді Мейрамкүл апа.
Жасы 60-тан асқан кейіпкеріміздің жолдасы да аграрлық салада көп жыл көлік тізгіндеген. Қармақшы аудандық партия комитетінің бірінші хатшысы қызметін атқарған Елеу Көшербаевтың «сендер ауылды көтеруге атсалысуларың керек» деген сөзі ерлі-зайыптыларды жігерлендірген еді. Екеуі Жосалыда тұрып, сонда өсіп-өнді.
Егістік басында ер азаматтармен иық тірестіре жұмыс істеген жылдар Мейрамкүл апайдың кешегідей есінде.
– Ол кезде заман тыныш, адамдардың пейілі кең еді ғой. Ер-әйел деп бөлінбей, қандай тапсырма болса да бірге атқардық. Бүгінде бейнетіміздің зейнетін көріп отырмыз, – дейді ол.
Кейіпкеріміздің еңбегінің елеусіз қалған кезі жоқ. Ол – КССР-дің Құрмет грамотасының, «Еңбектегі ерлігі үшін», «Еңбек даңқы» медальдарының иегері.
Назерке САНИЯЗОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
