Көктемнің алғашқы күні «Алғыс айту» мерекесімен тұспа тұс келеді. Бұл туралы Елбасы «Қазақстан халқы Ассамблеясы құрылған күн – 1 наурызды жыл сайын барлық этностардың бір-біріне мейірбандық танытып, ол адамдарды өз туғанындай қабылдаған қазақтарға алғыс айту күні ретінде атап өту әділетті болар еді.
Ол күн бізді бұрынғыдан да жақындастыра түспек. Себебі, бұл күн мейірімділіктің, бүкіл қазақстандықтардың бір-біріне деген достығы мен махаббатының жарқын мерекесі бола алар еді», – деген болатын.
Сондықтан да барша қазақ елі “Алғыс айту” күнін күрделі уақытты иық тіресе бірге еңсеріп, қысқа мерзім ішінде Елбасының басшылығымен Тәуелсіз Қазақстанды құру жолында аянбай тер төккен еліміздің барлық азаматтарының бір-біріне құрмет көрсететін күні деп біледі. Әсіресе, бұл мерекеде басқа этнос өкілдері қиын-қыстау кезеңде өзгені өзектен теппей, бір үзім нанын бөліскен қазақ жұртына риясыз алғыс айтатын күн санайды.
Сондай жандардың бірі – татар ұлтының өкілі Венера Гафурова. Ол бүгінгі бақытты ғұмырын қазақ елінің дархан көңілінің арқасы деп біледі.
– Алғыс айту күні – өткенімізге көз тастап, еліміздегі достық сенімді нығайтуға жол ашқан үлкен мүмкіндік. Қазақ – жатсынуды, бөлектеуді білмейтін халық. Сондықтан да айтулы мерекеде татар ұлтының атынан барша ұлтты бауырына басқан қазақ жұртына мың алғыс айтып, құтты мекенге айналған еліме ризашылығымды жеткізгім келеді. Мен – Сыр елінің перзентімін. Осында туғаныма мақтанамын. Мұнда бақытты балалық шағым өтті. Өзімнің кәсібімді ашуға мол мүмкіндіктер берді. Ендігі жерде осындай кеңпейілді қазақ елі үшін қызмет еткім келеді, – деді Венера.
Венера Ривгатқызы Т.Рысқұлов атындағы Қазақ экономикалық университетінде экономист мамандығы бойынша білім алған. 2013 жылы «МАБ» Халықаралық Бизнес академиясының магистратурасын бітірген. Оқуын тәмамдаған соң туған жеріне қайта оралып, «Торғай Петролеум» АҚ – экономист, 2007-2013 жылдары «Энергомонтажавтоматика» ЖШС-ның қаржы директоры қызметтерін атқарады. 2013 жылдан бері мұнай өнімдерін көтерме сататын «Alef trade» ЖШС директоры болып жұмыс жасайды. 50-ге жуық адамды жұмыспен қамтып отыр. Өзінің еңбекқорлығымен танылған Венера «Персона» сұлулық салонын да ашқан.
Кәсібін дөңгеленткен келіншек татар этномәдени бірлестігінің мүшесі. Оны жұртшылық жомарт қолды жанашыр ретінде де жоғары бағалайды. Себебі, Қарағанды облысын су басқанда тасқыннан зардап шеккендерге алғаш болып көмек қолын созды. Жаны нәзік болса да, ерге тән ісімен елді сүйсіндіріп жүретін кәсіпкер үнемі ізденіп, қоғамдық жұмыстарға белсене араласып отырады. Әсіресе, мұқтаж жандарға қол ұшын созу, әлеуметтік жауапкершілікті сезіну оның басты қағидасы. Өңірде қандай да бір қайырымдылық шара өтетін болса, әркез бастамашылдық танытып, әлеуметтік жағынан аз қамтылған, көпбалалы, тұрмысы төмен отбасыларға, мүгедек жандарға көмек беріп келеді. Оның ішінде «Атамекен» отбасы үлгісіндегі балалар ауылының тұрақты демеушілерінің бірі. Мұндай игі істі өзінің адамгершілік борышым деп есептейді.
– Біреуге қандай да бір жақсылық жасасам ел көрсін, білсін деп жасамаймын. Бұл – менің перзенттік парызым. Еліме, халқыма деген ризашылығым, – дейді.
Венераның еңбегі еш елеусіз қалған емес. 2016 жылы «Алғыс хат» пен «Құрмет грамотасын» иеленсе, 2017 жылы ІІІ республикалық меценаттар форумында «Жомарт жан» медалімен марапатталды. Көпке үлгі болған нәзік жан бүгінде екі баланың анасы, аяулы жар.
Мейрамгүл ДАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
