Ел қуанышы еселеніп, республикалық маңызы бар «Қызылорда-Жезқазған» жолының Сыр бойындағы бөлігі іске қосылды. Бұл күрежол біраз жылдан бері күрмеуі шешілмей келген, халық арасында көп талқыға салынған мәселелердің бірі еді. Мемлекет басшысы Қасым-Жомарт Тоқаев «Қызылорда-Жезқазған» автомобиль жолының құрылысын мерзімінде бастауды және сапалы әрі халыққа қолайлы жағдай жасауды тапсырып, соның нәтижесін халық болып көріп отырмыз.
80-жылдардың басында аталған жолға асфальт қабатын төсеу жобалары қолға алынуы керек еді. Бірақ іске аспады. Аса мән берілмеді. Кеңес заманында облыс басшысы Е.Әуелбеков, егемендіктің бастапқы уақытында С.Шаухаманов, Б.Сапарбаев сынды қайраткерлер бұл мәселені Үкімет назарына жиі ұсынғанын білеміз. Көлік тізгіндегендер мен жолаушылар жаздың аптабы мен қыстың қақаған аязында жолда қалу жағдайлары бұған дейін көп болды. Енді қиын күндер артта қалғандай.
Жалпы Мемлекет басшысының, Үкіметтің ерекше қолдауы және аймақ басшысы Нұрлыбек Машбекұлының іскерлігінің арқасында кейінгі үш жылда Қызылорда облысында 1600 шақырым автомобиль жолы мен көшелерді, 30 көпір өткелін салуға, күрделі жөндеуден өткізуге 150 млрд теңгеге жуық қаржы бөлінді. Нәтижесінде бірқатар маңызды жоба жүзеге асырылып, елді мекендердің арасындағы қатынас жақсарып, көлік қозғалысының қауіпсіздігі артты.
Нақтырақ айтқанда, қаладағы басты көшелердің бірі саналатын «Тәуелсіздікке 25 жыл» даңғылын 2 жолақтан 4 жолаққа дейін кеңейту жұмыстары жүргізіліп, пайдалануға берілді. Бұдан бөлек, жуырда ғана Әбілқайыр хан көшесінен Саламатов көшесіне дейін 4 жолақты жол құрылысы аяқталды. Сұлтан Бейбарыс көшесі, Назарбаев даңғылы қайта түледі.
Облыс орталығындағы Жаппасбай батыр көшесіндегі үлкен жолайрық қайта жаңғыртудан өтті. Қорқыт ата әуежайының жаңа терминалынан бастап, Президент саябағына дейінгі аралық 4 жолақты болып кеңейтілді. Жол бойындағы Сыздық, «Жаңадария», «Шіркейлі» каналдары үстіндегі 3 көпір қайта жаңғыртылды.
Ал биыл өңірде жол инфрақұрылымын дамытуға бюджеттен барлығы 50 млрд 605 млн теңге бөлініп, ұзындығы 329 шақырымды құрайтын автомобиль жолы, көшелер мен көпір өткелдері жөндеуден өтуде. Осының арқасында өңірдегі жақсы жағдайдағы жолдардың үлесі 95 пайызға жетеді.
Жол – жай ғана инфрақұрылым емес. Жол – халықтың тынысы, өңірдің тамыры, елдіктің ең басты тіректерінің бірі. Сапалы жол – қауіпсіздік, қолайлылық, уақыт үнемі және ең бастысы, халықтың тұрмыс сапасының артуы.
Жоғарыда айтылған «Қызылорда-Жезқазған» жолы – көпшіліктің ортақ еңбегі, билік пен мердігер ұйымдардың үйлесімді жұмысының нәтижесі. Ал бұл жол Ұлытау облысының орталығына дейін толық аяқталса, болашақта біздің өңір ғана емес, көршілес облыстардың да дамуына тың серпін берері анық. Сондай-ақ жолаушылар қозғалысын жеңілдетіп, кәсіпкерліктің өркендеуіне мүмкіндік туғызатынына сенім мол.
Өмірбек ШӘМЕНОВ,
Көлік министрлігінің еңбек ардагері,
Жалағаш ауданының құрметті азаматы,
«Құрмет» орденінің иегері,
облыстық ардагерлер кеңесі төрағасының орынбасары
