Бүгінде құқық қорғау органының қызметкерлеріне көңілі толмай, сынап жататындар көп. Әйткенмен, қай салада да қызметіне адал азаматтар жетерлік. Мысалға алар оқиғаның бірі Қасымхан Қыдырбаев есімді азаматтың басынан өткен-ді.Қасымхан осыдан аз-кем уақыт бұрын Шиелі ауданына жол тартқан. Шетелдік көлік жүйткіп Тартоғай ауылының тұсына жеткенде кенет телефон шырылдайды. Тұтқаның арғы жағынан «Бұл Қыдырбаев Қасымхан ба екен?» деді бейтаныс жігіт. Сыпайы сәлемдесіп, өздерін таныстырған азаматтар жолда оған тиесілі автокөліктің мемлекеттік нөмірін тауып алғанын және оны табыстайтынын жеткізді.
Дереу тоқтап, көлікті айналшықтаған Қасекең көлік нөмірінің түсіп қалғанын көреді. Міне, сол нөмірді тапқан ОПД жергілікті полиция қызметінің ППР 1-взводының аға қызмет инспекторлары Феликс Амрекулов пен Нұрмұхамед Мусалимов орталықтандырылған база арқылы иесін анықтап, табыстады. Қызметіне адалдық деп осыны айт.
– Егер де олар қайтарып бермесе, нөмірді қайта жасату үшін қаншама уақытым мен қаражатымды жұмсар едім. Жігіттерге рақмет, – деді Қ.Қыдырбаев ағынан жарылып.
Өмірде осындай жағдайға кезіккен жандар көп. Сақшылар олардың да жанынан табылары сөзсіз.
Дәулет ҚЫРДАН.
>>> Біздің Facebook, Instagram парақшаларымыз бен Telegram каналымызға жазылыңыз! <<<
