Елімізде аграрлық, индустриалдық, техникалық және құрылыс-сәулет сияқты салаларға серпін беретін жұмысшы мамандықтарының жетіспеуі басты мәселенің біріне айналып отыр. Осыған байланысты Мемлекет басшысы 2025 жылды «Жұмысшы мамандықтар жылы» деп жариялады. Жыл аяқталуға таяу, дегенмен аталған бағытта біршама жұмыс атқарылып, нәтижесін бере бастады.
«Қандай нәтиже?» деген сауалға жауап бере кетсек, ең алдымен өңірдегі жұмысшы мамандар даярлайтын оқу орындарының материалдық-техникалық базасы жаңғыртылды. Соның көрінісі, бұл мамандықтарға деген көзқарас та жаңарды, яғни жас түлектердің қызығушылығы арта түскен. Өйткені қазіргі аграрлық салада пайдаланып жүрген заманауи техникалар автоматтандырылған, басқару біршама жеңілдеген. Дәл осылайша, басқа да салалардың жұмысы жаңаша технологияға негізделген.
Қоғамның қай саласына болсын, кәсіби шеберлігі жоғары, тәжірибелі кадрлар қажет. Осындай мамандарды дайындайтын оқу орындарының бірі – Жалағаш индустриалды-аграрлық колледжі. Оқу орны 60 жылдан аса қызмет көрсетіп келеді. Бүгінде колледжде еңбек нарығына қажетті 5 мамандық, 10 біліктілік бойынша даярланады. Нақтырақ айтсақ, білім алушылар аспаз, кондитер, құрылысшы, ауыл шаруашылығы механизаторы, электромонтер, жеміс-көкөніс өсіруші сияқты кәсіптерді игеріп шығады.
Колледж басшысының міндетін атқарушы Нұртай Жонтаевтың айтуынша, 2025-2026 оқу жылында 78 студент қабылданған. Барлығы 242 студент білім алады, оның ішінде 184-і шәкіртақымен қамтылған. Оқу орнында тек теориялық білім берумен шектелмей, тәжірибелік машықтарды меңгертуде де үлкен қадам жасалып отыр.
Кейінгі жылдары оқу орнының материалдық-техникалық базасы жаңартылып, «Тамақтандыруды ұйымдастыру», «Ауыл шаруашылығын механикаландыру» мамандықтары «Жас маман» бағдарламасы бойынша жаңа үлгіде жабдықталған. Сонымен қатар, спорттық жаттығу залының жабдықтары да жаңартылып, талапқа сай қызмет көрсетеді.
– Ауыл шаруашылығын механикаландыру мамандығы бойынша заманауи техникалар алынып, колледж студенттерінің практикалық білімін көтеруге жұмыс жасалуда. Бұл бағытта аудандағы іргелі шаруашылық – «Таң ЛТД» ЖШС-мен келісімшарт жасалып, жас мамандар шаруашылық егінжайында тәжірибеден өтеді, – дейді колледждің аға шебері Бақытжан Абдыраманов.
Ал өндірістік оқу шебері Ақкенже Шідербаева «Тамақтандыруды ұйымдастыру» мамандығы бойынша колледж түлектерін тәжірибеден өткізу үшін «Айнабаева» жеке кәсіпкерлік нысанымен келісім жасалғанын айтты. Сонымен қатар, жаңаша жабдықталған асханада «Аспаз зертханасы» жұмысы жолға қойылған.
Жалпы оқу орнында 17 теориялық оқу кабинеті жұмыс жасайды. Колледж студенттері «WorldSkills» кәсіби шеберлік чемпионатына жыл сайын қатысып, жоғары нәтиже көрсетіп жүр. «Жұмысшы мамандықтар жылында» «Байқоңыр» ғарыш кешенінің 70 жылдығына орай өткен «Менің мамандығым – менің мақтанышым» атты сайыста тасымалдау техникаларын құрастыру бойынша Жалағаш индустриалды-аграрлық колледжінің 3-курс студенті Ақниет Мейірханұлы (жетекшісі Нұржан Серікұлы) 1-орынды жеңіп алған. Сондай-ақ ол өткен жылы «Жас өнертапқыш» бағытында аудандық «Жалын» жастар сыйлығын иеленген.
Жоғарыда айтып өткеніміздей, мемлекет қолдауының нәтижесінде ескі түсінік өзгерген, жаңашылдық көріністері айқын байқалады.
Ғазиза ӘБІЛДА,
«Сыр бойы»
