Ол Сексеуіл ауылдық клубының меңгерушісі еді. Клубтың күнделікті жұмысы мәдени іс-шаралардың арасында ән өнерін әдемі деңгейде әлпештеп, сазын салтанаттап сахнаға шығатын.
Ән айтқанда жанарынан жалын атып, әлдебір алысқа көзін тігіп, тыңдаушысын үнмен тербетіп, әуенмен асқақтатып, жүрегімен жан беріп, ешкімге ұқсамайтын даусымен, көңіл көмкеріп тәтті иірімнің таңғажайып үлгісін тамырлата білетін. Ол ән боп асқақтап, ән боп әуелеп, ән боп өмір сүретін. Халық әндерінің қадіріне жетіп, ән тарихының оқиғасын өне бойынан өткеріп кемелдете, мәнерлете ән өнері мәңгілік екенін, адами заттың арман-мақсатын үлгілеп айтып отыратын.
Шуағы мол адам еді, қайран Сейтқали аға… Ол ән айтқанын абырой көретін, көрерменнің алдына шыққанын атақ көретін. Даңғаза мадақтардан қашқақтап, «қойшы соны» деп тыйып тастайтын. Бірде Сейтқали ағамыз «Оңталап, ән аманатым сенің қасыңда жүр, көз қырыңды салып қоярсың, бала ғой, бастауы бар екенін білесің» деп қоңырау шалғаны бар. «О-о, Сәкесі, Сәкеннің сәні мен әніндей салтанатыңды осы Нұрболатың жалғастыратын болады. Әлі бәрін көзіңізбен көресіз» деп телефонда амандасып, телефонда қоштасқан болатынбыз.
Сейтқали Сейтмұратов – біртуар талант, Арал аспанында ән әуелеткен азамат. Сексеуілде тұрып, өнер өрнектеген, азаматтық арайын көпке түсіріп, Құдай берген қасиетін ән миуасына айналдыра білген, қасиет кенері ән болып тасыған асыл аға еді.
Қазір баласы Нұрболат Астанада өз өнер түндігін ашып, өмір сәулелеп жүр. Ол да Сейтқали ағамыздай әнге ғашық. Әнші бейнесі сана көгімізде жарқырай берсін.
Оңталап Нұрмаханов,
ҚР «Мәдениет саласының үздігі» төсбелгісінің иегері, ақын,
Режиссер
>>> Біздің Facebook, Instagram парақшаларымыз бен Telegram каналымызға жазылыңыз! <<<
