Нұр-Сұлтан қаласында ҚР Мәдениет және спорт министрлігінің ұйымдастыруымен өткен «Рухани қазына – 2019» мәдениет және өнер саласы шағын ұйымдары мен қызметкерлерінің ІІ республикалық фестивалінде облыстық халық шығармашылығын дамыту орталығы «Үздік облыстық халық шығармашылығы орталығы» аталымы бойынша бас жүлдені және 1 миллион теңгенің сертификатын жеңіп алды.
Сондай-ақ, 18 аталым бойынша 200-ден астам мәдениет саласының қызметкерлері қатысқан шарада Ә.Тәжібаев атындағы облыстық әмбебап ғылыми кітапханасының бөлім меңгерушісі Қалдыгүл Досмағанбетова «Облыстық маңызы бар кітапхананың үздік мемлекеттік қызметкері» номинациясы бойынша жеңімпаз атанып, Қазақстан Республикасы Мәдениет және спорт министрлігінің «Мәдениет саласының үздігі» төсбелгісімен марапатталды.
Айта кетейік, елімізде екінші мәрте ұйымдастырылып отырған фестиваль Қазақстан Республикасының Тұңғыш Президенті – Елбасы Н.Ә. Назарбаевтың «Рухани жаңғыру» бағдарламалық мақаласының «Туған жер» арнайы жобасы аясында өткізілді.
Фестивальдің мақсаты – мәдениет саласы қызметкерлерінің қызметінде тәжірибе алмасуға мүмкіндік беру, соның ішінде кітапхана, музей, мәдени ойын-сауық саласындағы қызметкерлердің кәсіби шеберлігін арттыру, қазақстандық патриотизм мен ұлттық-мәдени бірлікті дамыту аясында ұлттық мәдениетті насихаттау, аймақтық мәдениет ұйымдарының имиджін көтеру, үздік әлеуметтік-мәдени және білім беру тәжірибелерін ортаға салу.
Өнер биігінен көрінген жерлестеріміздің шығармашылығына сәттілік тілейміз.
Мейрамгүл дАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
