Жақында көркемсурет галереясында «Болашаққа бағдар: рухани жаңғыру» бағдарламасы аясында Қазақстан Суретшілер одағының мүшесі Жайлаубай Байсаловтың «Боранды бекет» атты жеке шығармашылық көрмесі өтті. Оған облыстың зиялы қауым өкілдері, қылқалам және қолөнер шеберлері, қоғамдық қор мүшелері, ардагерлер, студенттер мен қала тұрғындары қатысты.
Көрме барысында ҚР Суретшілер одағы облыстық филиалының төрағасы Аманкелді Кененбаев, суретшілер Рахым Шегебаев, Иассауи Ағытаев Жайлаубай Байсаловтың еңбек жолы мен шығармашылығы жайында кеңінен айтып берді. Облыстық тарихи өлкетану музейі директорының орынбасары Ж.Ахметова көрменің жастар үшін маңыздылығы зор екенін жеткізді.
– Жеке көрме өткізуді көптен бері ойлап жүрген болатынмын. Дайындық та біраз уақыт бұрын басталды. Көрмеге 60-қа жуық жұмысым қойылды. Мұнда 1980 жылы алғаш салынған суреттерім де бар. Сонымен бояуы әлі кеуіп үлгермеген туындылар да ілінді. Бұл шығармаларымнан 2012 жылы Қастеев музейінде де көрме ұйымдастырылды, – дейді суретші.
Сондай-ақ, суретші көрменің аты не үшін «Боранды бекет» аталғаны жайында кеңінен әңгімелеп, ұйымдастырушыларға алғысын білдірді.
Қылқалам иесі тіршіліктің мың сан бояуларын ішкі дүниесімен үндестіріп, өзіне тән әдемі иірім тапқан. Әрбір туындысынан ұлттық болмысымызды анық көруге болады. Қылқаламға қызығушылығы ерте оянған ол осы уақытқа дейін талай белестерді бағындырды. Жайлаубай Жұмамұратұлы 1976 жылы Шымкент қаласындағы Ә.Қастеев атындағы көркемсурет училищесінде білім алды. 2005 жылы Байқоңыр қаласындағы ҚР Президенті өкілдігіне 10 жыл толуына орай өткен шарада «Алтын адам» сыйлығы берілді. Ж.Байсалов көптеген республикалық және шетелдік көрмелерге қатысқан. Суретшінің жұмыстары Франция, Англия, АҚШ, Ресей мен Германияның мұражайлары қорларында сақталуда. Автордың шығармашылығы табиғат, натюрморт, портрет, анималистік жанрларға арналған. Әрбір туындысының өзіндік бояуы, өрнегі бар.
Көрмеге жиналғандар суретшінің шығармашылығымен кеңінен танысып, ерекше әсер алды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
