Мәдениет және ақпарат министрлігі жуырда Ташкент қаласында Ислам әлемі білім, ғылым және мәдениет мәселелері жөніндегі ұйымы – ИСЕСКО Мәдени мұра комитетінің XIII сессиясы өткенін хабарлады.
Жиында мүше мемлекеттерден түскен 100-ден астам өтінім қаралып, оның ішінде Қазақстан ұсынған екі номинация «Ою-өрнек» және «Қармақшы жыраулары» Ислам әлемі мұралары тізіміне енді.
– Бұл қабылданған шешім – Қазақстан Республикасының ислам әлемінің материалдық емес мәдени мұрасын сақтау, зерттеу және насихаттау бағытындағы жүйелі жұмысының жоғары деңгейде мойындалуының айқын көрінісі. «Қармақшы жыраулары» ИСЕСКО тізіміне енуі осынау ұлттық өнеріміздің одан әрі қорғалуына, ғылыми тұрғыда жан-жақты зерттелуіне және халықаралық деңгейде кеңінен ілгерілеуіне мүмкіндік береді.
Ұлттық руханиятымыз бен дәстүрлі өнеріміздің мәртебесін арттыратын маңызды тарихи оқиға, – дейді белгілі жырау, Қазақстанның еңбек сіңірген қайраткері Ұлжан Байбосынова.
Осы орайда ол «Қармақшы жыраулары» бойынша ұсыныс берген өнертану докторы Саида Еламановаға алғысын білдіре отырып, келешекте Көшеней Рүстембеков атындағы жыраулар үйі әлемдік деңгейдегі мәдени орталықтардың біріне айналып, Қармақшы жыраулық өнерінің әрі қарай дамуына өз үлесін қосарына сенім артатынын жеткізді.
Айта кетейік, бұған дейін ИСЕСКО Мәдени мұра комитетіне Т.Жүргенов атындағы қоғамдық қор атынан да ұсыныс жолданып, онда «Қармақшы жыраулары» ежелден жалғасып келе жатқан жыраулық дәстүрдің иелері, олардың репертуарындағы дастан, аңыз, рухани өсиеттер мен тарихи шежірелер мұсылман әлемінің рухани-мәдени мұрасының ажырамас бөлігі ретінде халықаралық деңгейде мойындалуға лайық екені жазылған.
Аталған комитеттің XIII сессиясында арнайы баяндама жасаған өнертану докторы Саида Еламанова жоғарыда аталған ұсынысты қорғап шығып, «Ою-өрнек» және «Қармақшы жыраулары» Ислам әлемі мұралары тізіміне енді.
«СБ» ақпарат
