Өзбекстандағы Қазақстан жылы аясында І.Омаров атындағы Қостанай облыстық қазақ драма театрының ұжымы көрші елге гастрольдік сапармен барады.
Сапар барысында өзбекстандық көрермен назарына Қазақстанның еңбек сіңірген қайраткері, жазушы-драматург, жерлесіміз Жолтай Әлмашұлының «Мұңмен алысқан адам» драмасы ұсынылады. Шығармаға Францияда тұрып жатқан Асан қарияның туған жерге деген сағынышы өзек болған. Ерте заманда елінен жырақтаған ол қартайған шағында туған өлкесіне оралуды аңсайды. Әкесінің бұл арманына үлкен ұлы Марат қарсы келеді. Тек кіші ұлы Елжанның демеуімен атамекенге оралып, арманына жетеді. Автор осылайша жастардың шет ел асып, елге оралуға асықпайтынын, баланың ата-анаға құрметін әсерлі етіп жеткізуге тырысқан.
Басты кейіпкерді Қазақстанның еңбек сіңірген қайраткері Қонысбек Бегайдаров сомдайды. Қоюшы режиссер – Қазақстанның халық артисі Ерсайын Төлеубай, қоюшы суретші – Маралбек Нұрмаханов. Спектакль Хамза атындағы Өзбекстан ұлттық академиялық драма театрында сахналанады.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
