Елбасы Нұрсұлтан Әбішұлы Назарбаевтың «Рухани жаңғыру» бағдарламалық мақаласы аясында Қазақстан Республикасы Мәдениет және спорт министрлігінің ұйымдастыруымен өткен Мәдениет және өнер саласы ұйымдары мен қызметкерлерінің республикалық «Рухани қазына – 2020» фестивалінде облысымыздың бірқатар мәдениет ұйымдары мен сала мамандары жеңімпаз атанып, арнайы номинациялармен марапатталды.
Атап айтар болсақ, «Үздік облыстық зағип және нашар көретін азаматтарға арналған кітапхана» номинациясымен – облыстық зағип және нашар көретін азаматтарға арналған арнаулы кітапханасы, «Үздік музейлік онлайн жоба – 2020» номинациясымен – облыстық тарихи-өлкетану музейінің «Асыл мұра» тележобасы, жоба авторы музейдің бөлім меңгерушісі Әйгерім Бекқұлиева, «Үздік ауылдық мәдениет үйі, клубы» номинациясымен – Жалағаш ауданы, Аққұм ауылдық клубы, «Үздік ауылдық маңызы бар мемлекеттік музей» номинациясымен – облыстық тарихи-өлкетану музейінің Ы.Жақаев атындағы күріш өсіру тарихы музейі филиалы, сондай-ақ, А.Жұбанов атындағы арнайы жүлдемен – Қазалы аудандық мәдениет орталығының директоры Кемеңгер Өтеп марапатталды.
Қазіргі таңда облыстағы мәдениет ұйымдарында өнердің түрлі жанрлары бойынша 854 көркемөнерпаздар үйірмесі жұмыс жасайды. Оған 10 мыңнан аса өнерпаз қамтылған. Үйірмелердің 340-ы балаларға арналған болса, 376-сы жасөспірімдер мен жастарға қызмет көрсетеді. Бұл орталықтарда жасөспірімдер вокал, би, драма, домбыра, қобыз, баян аспаптарында ойнауды үйреніп, хор, жыр-терме, көркемсөз, қолөнер, бейнелеу өнерінен де шығармашылық қабілеттерін шыңдайды. Сондай-ақ, 130-дан астам егде жастағыларға арналған үйірмеде ардагерлер, әжелер ансамбльдері және отбасылық, фольклорлық ансамбльдер, ұлт аспаптар оркестрлері жұмыс жасайды. Бұдан бөлек, балалар мен жасөспірімдерді дәстүрлі өнерге баулу мақсатында «Жыр мұра» жобасы жалғасуда. Сондай-ақ, облыста 63 халықтық атағы бар өнер ұжымы жемісті жұмыс жасап келеді.
Ғазиза Әбілда,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
