Кеше облыс әкімінің орынбасарлары Наурызбай Байқадамов және Бақыт Жахановтың қатысуымен облыстық мәслихаттың кезекті 48-ші сессиясы өтті. Алғашқы мәселе – «Облыста тарихи-мәдени мұраларды пайдалану мен қорғаудың жай-күйі және оны жақсарту шаралары туралы» облыстық мәдениет, архивтер және құжаттама басқармасының басшысы Мирамкүл Әбуова хабарлама жасады.
Хабарламашы атап өткеніндей, бүгінгі күні облыс көлемінде 545 тарихи-мәдени мұра объектісі мемлекет қорғауына алынған. Оның ішінде 30 ескерткіш республикалық және 257 ескерткіш жергілікті маңызы бар тарихи және мәдени ескерткіштер тізіміне ілінген. Ал 258 нысан тарихи-мәдени мұра объектілерінің алдын ала есепке алу тізіміне алынған.
Басқарма басшысы облыс бойынша 64 ескерткіштің қорғау аймағы белгіленгенін жеткізді. Оның ішінде 23-і бойынша мұндай жұмыстар 2019-2020 жылдары жүзеге асырылған. Ал Сығанақ, Жанкент қалашықтары мен Қорқыт ата кешенінің қорғау аймақтары толық қоршалған. Биыл облыстық бюджет есебінен Қызылорда қаласындағы жергілікті маңызы бар Ақмешіт музейі (Бұрынғы Теміржол милициясы) ғимаратын қайта жаңғыртудан өткізудің жобалық-сметалық құжаттамасы әзірленсе, Қазалы ауданындағы Орақ мұнарасы мен Ғани Мұратбаев оқыған мектеп ғимаратына жөндеу жұмыстары жүргізілген. Оның алғашқысы облыстық, екіншісі аудандық бюджет қаржысымен жүзеге асып отыр. Сонымен қатар, 2020 жылы облыстық бюджет есебінен 6 археологиялық ескерткішке – ежелгі Бәбіш мола және ортағасырлық Сортөбе, Жанкент, Сығанақ, Қышқала, Асанас қалашықтарына қазба жұмыстары жүргізілді.
Хабарламашы, сондай-ақ, алдын ала есепке алу тізімінде тұрған 258 ескерткішке мониторинг жасалып, кезең-кезеңімен мәртебе беру мақсатында 2021 жылы 130 ескерткішке сараптама жұмыстарын жүргізу үшін облыстық бюджетке өтінім берілуде екенін айтты. Алдағы кезеңдері археологиялық қазба жұмыстары жалғасатын болады. «Цифрлық Қазақстан» бағдарламасы аясында тарихи-мәдени мұраларды сандық форматқа көшіру және ескерткіштердің 3D форматтағы интерактивті картасын дайындаудың ІІ кезеңі жүзеге асырылады. Сол секілді халық жазушысы Мұхтар Әуезовтың 125 жылдық мерейтойына орай жазушының облыс орталығындағы ескерткішінің орнын ауыстырып, сапалы материалдан қайта салу жоспары бар.
Сессияның күн тәртібіндегі алғашқы мәселе бойынша құрылған уақытша комиссияның төрағасы, депутат Ибадулла Құттықожаев қосымша хабарлама жасады. Ол пандемия жағдайының өзінде салалық басқарма жоспарланған жұмыстарды өз деңгейінде атқарып келе жатқанын атап өтті. Ал проблемалық мәселелер қатарында ескерткіштерді қорғау аумағындағы жер телімдерінің шаруашылық кәсіпкерлік мақсатқа беріліп кетуін атады. Ол 2021 жылы жоспарланып отырған жұмыстарға бағытталған қаржы 283,4 млн теңге екенін жеткізді.
Халық қалаулылары Сыр елінің тарихи-мәдени құндылықтарын сақтау, қорғау кейінгі ұрпаққа мұра етіп қалдыру бағытындағы жобаларды қолдап, дауыс берді. Сессияда күн тәртібіне енгізілген өзге де мәселелер бойынша талқылаулар болып, тиісті шешімдер қабылданды.
Ыдырыс Тәжіұлы,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
