Маусым айының 1-10 аралығында Түркияның Кастамону, Болу, Ақсарай және Анкара сынды 4 бірдей қаласында ТҮРКСОЙ Халықаралық ұйымының 25 жылдық мерейтойы аясында түркі халықтарының өнер фестивалі өтті.
Өнер саңлақтарының басын қосқан шараға Сыр елінен Тұрмағамбет атындағы халық-аспаптар оркестрі қатысты.
Оркестрдің гастрольдік бағдарламасы Кастамону провинциясының Таскөпір қаласынан басталды. Концертке жиналған көрермендер, музыканттар өнерін ерекше ықыласпен қабыл алды. Өнерпаздар орындаған халық әндері мен Қорқыт, Құрманғазы және Әлшекейдің күйлері, классикалық шығармалар Кастамону көрермендерін тамсандырды.
Биыл ТҮРКСОЙ шешімімен түркі әлемінің мәдени астанасы аталған Кастамону – Түркияның солтүстік жағындағы көне қалаларының бірі. Оның іргетасы б.д.д. VIII ғасырда қаланған.
Болу, Ақсарай және Анкара қалаларындағы концерттер аншлагпен өтті.
– ТҮРКСОЙ ұйымының атынан оркестр музыканттарына тамаша концерттік бағдарлама үшін алғыс айтқым келеді. Қызылордалық халық-аспаптар оркестрінің фестивальға қатысқаны бекер емес, өйткені, Сыр елі – жыр елі қайталанбас талант иелеріне бай екенін бәріміз де жақсы білеміз, – деді ТҮРКСОЙ-дағы Қазақстанның өкілі Асқар Тұрғанбаев.
Ансамбль концерті оркестрдің бас дирижері Кеулімжай Ботабаев пен ҚР Мемлекеттік академиялық симфониялық оркестрі мен Н.Тілендиев атындағы «Отырар сазы» академиялық фольклорлық-этнографиялық оркестрінің дирижері Мүсілім Әмзенің басқаруымен өтті.
Сыр жұртшылығының мақтанына айналған оркестр 2007 жылы Тұрмағамбет Ізтілеуовтің 125 жылдығына арналған мерекелік шаралар аясында облыстық филармония жанынан құрылған. Құрамында 60-қа жуық музыкант жұмыс істейді.
Оркестр репертуарында 400-ден астам халық әндері мен күйлері, сондай-ақ, Қорқыт, Құрманғазы, Дина, Қазанғап, Шал Мырза, Бекпембет, Әлшекей, Жалдыбай, Досжан, Төлеген және өзге де қазақстандық және жергілікті композиторлардың шығармалары бар.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
