Балжан аймағымыздың экономика басқармасына жетекшілікке 1997 жылы келген еді. Сол уақытта мен қаржы басқармасы басшысы болғандықтан бірге тығыз жұмыс атқаруға тура келді. Ал онан бұрын Балжанды білетінім Алматы халық шаруашылығы институтын қаржыгер мамандығымен бітіріп, арнайы жолдамамен облыстық қаржы бөліміне қатардағы экономист болып келген 1985 жылдан басталады. Ол кезеңде институтты бітіргендерге диплом жолдамамен келген жас мамандарға тек қызметке орналасқаннан кейін берілетін еді. Сол жылдың күзінде институтты бітіргендігі туралы «қызыл дипломды» қаржы бөлімі меңгерушісінің орынбасары ретінде Балжанға мен өз қолыммен тапсырғаным бар.
Қаржы органдарында көп аялдамастан Қызылордада ашылған агроинженерлер, кейін политехникалық болып аталған институтта экономика саласы бойынша ұстаздыққа ауысып 10 жылдан аса жоғары білімді экономистерді дайындауда аянбай еңбек етіп, жүздеген шәкірттер тәрбиелеп өсірді. Өзі де осы институтта жүріп ғылыми жұмыстармен айналысып экономика ғылымдары кандидаты атағын абыроймен қорғады. Доцент ғылыми атағын алып, кафедра меңгерушісі лауазымын да атқарды.
Балжан Мөрәліқызының зор білімі, ел экономикасының айтулы білгір маманы екендігі 1996 жылы Қызылорда қаласында арнайы экономикалық аймақ құру кезінде айқын білінді. Осы аймақтың даму концепциясын, экономикалық есептерін, өңірдің әл-аухатын көтерудің жолдарын талдап, республикадағы орталық органдар алдында дәлелдеп шығу үшін жасалған есеп-қисаптардың арқасында ел Президенті арнайы жарлыққа қол қойып еді.
Осы арнайы экономикалық аймақ статусына ие болу біздің өңірімізге шетелдерден келетін құрал-жабдықтардың, техниканың кедендік алымдар мен төлемдерсіз жеткізілуі шаруашылық субъектілеріне де, тұтынушылар үшін де үлкен қаржылай жеңілдік болды. Сонымен қатар айрықша атап өтетін жағдай – бұрын республикалық бюджетке түсіп келген салықтық түсімдердің барлығының қала бюджетіне түсетіндігінен, яғни қаланың өзін-өзі қаржыландырылуы толығымен қамтамасыз етілген-ді. Осындай іс-шаралардың арқасында, біздің облыс тарихында алғаш рет республикада 1999 жылдың бюджетін бекіткенде Қызылорда облысының бюджеті 350 млн теңге «профицитпен», яғни кірісі шығысынан артық сомамен бекітілген болатын. Осылайша біздің облыс республикада алғашқы және соңғы рет «донор» облыстар қатарына ілігіп, бір мәрте айды аспанға шығарғанымыз бар.
Сол тұста Балжанның білімі, тәжірибесі ескеріліп, облыстың экономика басқармасы басшысы лауазымына, сол кездегі облыстың принципшіл, жаңашыл басшысы Бердібек Сапарбаевтың қолдауымен тағайындалды. Осы лауазымда қызмет атқарған кездері, кейінірек 2005 жылы бюджеттік жоспарлау функциясында экономика басқармасына берілгеннен соң, Шәменова өз қызметінде облыс экономикасының жан-жақты дамуының тамыршысындай, кемеліне келген экономист есебінде көрінуінің куәсі болдық. Аталған қызметте 15 жылдай басшылық лауазымда жүргенде облыс экономикасы бұрын-соңды болмаған жетістіктерге жетті. Өңірде үш ауысымды мектептер жойылды, барлық елді мекендерде медициналық мекемелер жүйесі жаңа ғимараттарға көшірілсе, облыста салынатын әлеуметтік объектілер , ауызсу, автожолдар құрылысы, аяқсуға арналған каналдарды салудың кезектілігі жасалынып, реттілік орнап еді. Облыс экономистері мен қаржыгерлерінің біліктілігі жоғарылап, республикада өздерінің тиісті орындарын алып, олармен санасатын жағдайға жетті.
Балжан Мөрәліқызының қолдауымен және бастамашылдығымен өңірдің экономика жүйесінің 80 жылдық, экономика, қаржы және банк жүйесінің 90 жылдығына арналған мерейтойлар өтті. Сала қызметкерлері мен ардагерлерге сый-сияпаттар жасалып, арнайы төсбелгілермен марапатталды. Осы шаралардың атқарылуында әріптесіміздің зор ұйымдастырушылық қабілетін және салаға шын жанашырлығын көрдік.
Кейінгі екі жылда Балжан Шәменова облыс әкімінің орынбасары лауазымына келіп, өңірімізде әлеуметтік саланың дамуына үлкен үлес қосып, халықтың ықыласын иеленді. Балжан Мөрәліқызы елордада жаңа қызметке шақырту алуына байланысты сонда ауысуға шешім қабылдаған екен. Ағасының ұлы Асылбек Шәменовтің қала әкімі болып қызметке келуі тұсында бұл әділетті әрі этикалық тұрғыдан дұрыс шешім, сондай-ақ кадрлық саясатқа байланысты жаңа ұстанымға лайықты үн қосу деп білеміз. Сондықтан мен әріптесім, Балжан қарындасыма мұнан кейінгі жауапты қызметінде де табыс тілеймін.
Белгілі қоғам қайраткері Мөрәлі әкеміз бен Айшонық шешеміздің аяулы да ардақты қызы Балжан қарындасымыз еліміздің атын шығарып жүре беретініне сенімім мол.
Қамбар Әжібеков,
Қазақстанның еңбек сіңірген қайраткері,
Кеңес Одағы қаржы жүйесінің үздігі
>>> Біздің Facebook, Instagram парақшаларымыз бен Telegram каналымызға жазылыңыз! <<<
