Дәстүрге айналған «Мектепке жол» қайырымдылық шарасы аясында биыл да тұрмыс жағдайы төмен отбасылар мен ата-аналарының қамқорлығынсыз қалған балаларға әлеуметтік көмек көрсетілмек.
Облыстық білім басқармасы мамандарының айтуынша, бүгінгі күні аудан және қаланың білім бөлімдері, ҮЕҰ тарапынан жұмысшы топтар құрылып, көмекке мұқтаж отбасылардың тізімдері жасақталып жатыр. Алғашқы онкүндік ақпарат бойынша көмек сұрағандар саны нақтыланған.
Дәстүрге айналған акция шеңберіндегі шараға облыстық білім беру ұйымдары қызметкерлерінің ұйымдастыруымен 50 балаға мектеп формасы мен құралдар табысталды.
Өңіріміздің бас педагогы Майра Мелдебекова республикалық акцияның әлеуметтік жағынан аз қамтылған отбасы балаларын қолдаудағы маңызы жайлы айтты.
– Жыл сайын Қазақстанда жаңа оқу жылының қарсаңында «Мектепке жол» қайырымдылық республикалық шарасын өткізу дәстүрге айналған. «Мектепке жол» акциясы аз қамтылған және көпбалалы отбасылардың оқушыларына көмек көрсетуге бағытталған. Бұл акция 1 тамыз – 30 қыркүйек аралығында осымен он бірінші жыл өткізіліп отыр, – деді.
«Жомарт» қоғамдық қорының директоры Мая Наримова акция аясында қайырымдылық марафоны өтетінін айтты.
– Марафон қоғамдық қоры мен жастар саясаты және білім басқармасының қолдауымен өтеді. 2000 билетті сату және демеушілер арқылы қорға түскен қаражат есебінен қаланың 200 жылдығына орай 1-сыныпқа баратын 200 балаға мектеп формасын орталық алаңда тапсырамыз, – деді М.Наримова.
Жыл сайын өткізіліп жатқан осынау шарада демеушілер мен меценаттар тарапынан көрсетілген көмектер мен қолдаулардың үлесі зор. Биыл да акцияға барлық деңгейдегі мекеме басшылары, кәсіпкер азаматтар, мемлекеттік қызметкерлер, үкіметтік емес ұйымдар, аудандық, қалалық білім бөлімдері, сондай-ақ, мектеп басшылары атсалыса алады.
Шынар БЕКБАН,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
