Тоқтаусыз уақыт бізді тағы бір оқу жылының соңына жеткізді. Ұрпақтар алмасып, мектеп бітірушілер үшін үлкен өзгерістер қарсаңындағы жаңа кезең басталды. Кеше облыстың барлық мектептерінде «Соңғы қоңырау» салтанатты жиыны өтіп, 7113 түлек жаңа өмірге жолдама алды. Түлектердің 4821-і, яғни 67,8%-і Ұлттық бірыңғай тестілеуге қатысады. Өткен жылмен салыстырғанда, сынаққа қатысушылар үлесінде айтарлықтай өзгеріс жоқ. Мектеп бітірушілердің 343-і «Алтын белгіге» үміткер. Алтын ұяларынан түлеп ұшқан қыз-жігіттердің білім бәсекесінде биіктерді бағындыратынына сенімдіміз. Өйткені, соңғы бес жылдағы бұл саладағы жетістіктер, алдыңғы толқынның үлгісі кеше мектеп бітірген түлектерді қанаттандырады деп ойлаймыз.
Біздің өміріміздегі барлық игіліктердің негізгі драйвері – адам, оның білімі мен дүниетанымы. Білімге ұмтылу, үйренуге құштарлық арқылы адам баласы бейтаныс ғаламның сырын ашуда. Бұл бағытқа жұмсалып жатқан қаржы мен күш-жігер, қойылып жатқан талаптардың нәтижесі көз алдымызда. Мәселен, өткен жылы мектеп бітірген 6196 түлектің 4123- і жаңа форматтағы ҰБТ сынағынан өтіп, орташа 82,4 балл жинады. Тестілеудің орташа балы республикалық орташа деңгейден де жоғары болды. Оған қоса 397 мектеп бітіруші «Алтын белгі» алды.
Осылайша, бітірушілердің 97 проценті колледждер мен университеттерге түскен еді. Бұл – мақтан тұтарлық, кейінгіге үлгі етерлік көрсеткіш! Бұл – мектеп бітірген жастардың болашағына жоспар құрғанын, оны орындауға бет алғанын айқындайтын көрсеткіш! Бұл – жастар өз күш-жігерін тек білім алуға қарай бағыттағанына, олардың жат ағымдар жетегіне кетпейтініне кепіл болатын көрсеткіш! Егер жыл сайын жаңа өмірге қадам басқан жастар осылайша түгелге жуық оқумен қамтылса, оларды болашақ мамандығын игеруге қатысты мәселелер ойлантса, өмірден орнын таппай қалу, беймәлім топтарға қосылу сияқты келеңсіздіктер өз-өзінен жойылар еді. Бұл тұрғыда облыс әкімі парасатты пайымды әркез жастар жадына сіңіріп келеді. Әлемдегі ақпараттық технологияның беталысы мұнай мен газға, табиғи байлыққа сүйенген кезеңнен біртіндеп өтіп бара жатқанымызды түрлі дәлелдермен нақтылай түсуде. Жаңа ғасыр – ақпараттық, цифрлық технологияларды, техникалық прогрессі игерген адамдардың ғасыры болатынын айқындауда. Осы тың бағыттың туын көтеретін бәсекеге қабілетті кадрларды дайындау – уақыттың да, еңбек нарығының да талабы.
Облыс мектептерінің түлектері 2014 жылдан бері Мәскеу мен Санкт-Петербургтің жетекші техникалық жоғары оқу орындарында оқи бастады. Қазір 452 сырбойылық Ресей Федерациясы бюджеті есебінен, аймақ экономикасының сұранысына сай мамандықтар бойынша Ресей Федерациясының үш оқу орнында – Мәскеу Ұлттық технологиялық зерттеу, К.Тимирязев атындағы Ресей мемлекеттік аграрлық, Санкт-Петербург мемлекеттік өндірістік технология және дизайн университеттерінде білім алуда. Сыр өңірі –жастардың талабын шыңдап, арманына қанат бітірген, үздік техникалық жоғары оқу орындарында білім алуға мүмкіндік берген бірден-бір облыс. Алдағы айларда алғашқы бітіруші түлектер қолдарына диплом алып, туған жерге оралады.
Келесі оқу жылынан бастап М.Ломоносов атындағы Мәскеу мемлекеттік университеті «Киберқауіпсіздік» және «Процестерді математикалық модельдеу» мамандықтары бойынша тағы 20 грантты жыл сайын бөлетін болды. Оған қоса жыл сайын 20 адамды ақпараттық және цифрлық технологиялар бойынша Иннополис университетінде оқыту туралы келісім бар.
Жыл сайын облыс әкімінің грантымен аз қамтылған және көпбалалы отбасылардан шыққан дарынды ауыл балалары аймаққа қажетті мамандықтарды игеруге еліміздің жетекші жоғары оқу орындарына жіберілуде. Бүгінде бұл грантқа 700-ге жуық адам ие болды. Ата-анасының іргедегі облыс орталығында оқытуға жағдайы келмесе де, білім алуға талабы бар баланың тауы шағылмауы керек. Жергілікті бюджет қаражаты есебінен әлеуметтік тұрғыдан халықтың осал топтарындағы көпбалалы отбасылардан шыққан студенттерге жылына бір рет оқу ақысын және тамақтану мен тұру шығындарын өтеуге әлеуметтік көмек беру туралы бұл шешім талай отбасына қуаныш сыйлады. Биыл да 159 дарынды балаға грант тағайындалып, оның 70 процентін ІТ-мамандықтарға бағыттау жоспарланған.
Жастарды жоғары және арнаулы білім алуға ынталандырған бағдарламаның бірі – «Серпін-2050». Бұл жоба 2014 жылдан бері жастардың кәсіптік және аумақтық мобильдігін арттыру үшін қолға алынды. Оңтүстік облыстардың түлектерін Солтүстік, Шығыс, Батыс Қазақстан өңірлеріндегі университеттер мен колледждерде білім алуына қолдау жасау мақсатында «Мәңгілік ел жастары – индустрияға» әлеуметтік жобасы аясында жүзеге асуда. Жыл сайын сырбойылық түлектер «Серпін» бағдарламасымен оқуға грант жеңіп алуда ең үздік нәтижелерді көрсетіп отыр. Бүгінгі күні 4000 бала осы бағдарлама бойынша білім алуда.
Қызылордалық жастардың болашағына жол ашқан гранттық бағдарламалар бойынша алғашқы қарлығаштар қанат қағатын уақыт таяп келеді. Жоғары білім алған, ақылы толысқан, санасы қалыптасқан, жүздері жарқын, сенім жүгін арқалауға әзір, елге қызмет етуге ынталы жастар – барлығымыздың көзқуанышымыз, мақтанышымыз.
Биылғы мектеп бітірген түлектердің де өздеріне дейінгілердің үлгісімен жаңа заманның шақыруларына сай мамандықтарды игеруге талпынысы зор. Талаптары оң болғай!
Гүлжазира ЖАЛҒАСОВА,
>>> Біздің Facebook, Instagram парақшаларымыз бен Telegram каналымызға жазылыңыз! <<<
