Аймақ басшысы Гүлшара Әбдіқалықова облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетовты қабылдап, 2020-2021 жылдардағы жылу беру маусымының өту барысын талқылады.
Биыл Қызылорда облысында жылу беру маусымы 10 қазаннан басталды. Қазіргі таңда өңірдегі 1185 әлеуметтік нысанның 1183-і жылумен қамтамасыз етілген. Сонымен қатар, бүгінгі күнге орталықтандырылған жылу жүйесіне қосылған Қызылорда қаласындағы 717 және Қазалы ауданының Әйтеке би кентіндегі 67 көпқабатты тұрғын үйге жылу берілген. Басқарма басшысы көмір мәселесінің де шешіліп жатқанын жеткізді.
– Қазіргі уақытта облыс тұрғындарына қажет 163,6 мың тонна көмірдің 86 проценті жеткізілген. Қалған қатты отынды кәсіпкерлер тасымалдауда. Алдағы уақытта өңірде көмір тапшылығы болмайды деп жоспарлап отырмыз. Ал, әлеуметтік сала нысандарына қажетті 39,5 мың тонна қатты және 26 мың тонна сұйық отын толығымен жасақталған, – деді облыстық энергетика және тұрғын үй-коммуналдық шаруашылық басқармасының басшысы.
Аймақ басшысы пандемия уақытында тұрғындарды түгел жылумен қамтамасыз етіп, оларды суық тиюден сақтау қажет екендігін қадап айтты.
– Қазіргі таңда әлемде болып жатқан эпидемиологиялық ахуалды бәріңіз жақсы білесіздер. Сондықтан халықты тоңдырмай, жылу маусымын сапалы жүргізуіміз қажет. Біздің мақсатымыз – тұрғындардың денсаулығын сақтау. Сондықтан облыстық энергетика және тұрғын үй-коммуналдық шаруашылық басқармасы қала, аудан әкімдерімен бірлесіп, бұл мәселені ұдайы назарда ұстаңыздар. Көмір мәселесін де толық шешіп, халыққа қолжетімді болуын қамтамасыз етіңіздер, – деді облыс әкімі.
Сондай-ақ, жылуға қарызы бар тұрғындар мен кәсіпкерлік нысандар туралы сараптама жасауды тапсырды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
