Жуырда Елбасы Астананы газдандыру туралы нақты тапсырма берді. Астана мен еліміздің орталық және солтүстік өңірлерін газдандыру жобасы Президенттің маңызды 5 әлеуметтік бастамасының қатарына кіргеніне қуаныштымыз.
Магистральдық газ құбырының ұзындығы – 1081 шақырым. Ол «Бейнеу -Бозой-Шымкент» газ құбырының Қызылорда облысы аумағындағы «Қараөзек» компрессорлық станциясынан бастау алады. Өндірісі дамыған Жезқазған, Қарағанды, Теміртау өңірлері арқылы Астанаға дейін жүргізіледі. Осы бағытпен газ құбырын салу арқылы 2,5 млн-ға жуық тұрғынды газбен қамтамасыз ету жоспарланып отыр.
Қазақстандық газды жеткізу энергетикалық қауіпсіздік қамтамасыз етеді. Газ – тұрғындардың өмір сапасын жақсартуға, әлеуметтік жағдайын көтеруге, шағын және орта бизнесті дамытуға ықпал етеді. Мыңдаған жұмыс орнын ашуға мүмкіндік береді. Ел ордасы үшін газ жеткізудің әлеуметтік-экономикалық және экологиялық әсері үлкен.
Көмір жағып отырған шамамен 250 жылыту орталығы, 20 мыңнан астам жеке тұрғын үйді газға ауыстыру, сондай-ақ Астанадағы 2 жылыту электр орталығын (ТЭЦ-1, ТЭЦ-2) газға көшіру көзделді. Кейінгі кезде тұрғындарды мазалап жүрген Астананың экологиялық ахуалы да жақсарады. Зиянды қалдық мөлшері 35 мың тоннаға азаяды.
Бұл жоба бүкіл солтүстік өңірді газдандыруға жол ашады. «ҚазТрансГаз» компаниясы маңызы зор осы жобаны жүзеге асыруға толығымен дайын.
Серді Ибулла Жұмағұлұлы,
«ҚазМұнайГаз» ҰК АҚ
газ тасымалдау және сақтау жөніндегі аға вице-президенті.
>>> Біздің Facebook, Instagram парақшаларымыз бен Telegram каналымызға жазылыңыз! <<<
