«Адам бүгін театрға ертең адам болып қалу үшін барады» деген канадалық режиссер Робер Лепаж. Расында, сан түрлі өнердің басын қосқан театр әлемінен жан дүниемізді мазалайтын өмірлік сұрақтардың жауабын табамыз. Мұнда бір уақыт келіп өзін іздеуді, рухани мінез-құлқын тануды әркім парыз санайды.
Жуырда біз де Н.Бекежанов атындағы облыстық музыкалық драма театрында болдық. Өнердің қара шаңырағы төл мерекесін, Халықаралық театр күнін тойлағалы жатыр екен. Шынайы өнерді сағынатын жұртшылық бұл күнді асыға күткені рас. Сахнаның безендірілуі де көптің көңілін көтерді. Салтанатты кештің шымылдығы театрда қызмет атқарған ардақты ардагерлерді еске алумен ашылды. Содан соң ҚР Мәдениет және спорт министрі Арыстанбек Мұхамедиұлының және облыстық мәдениет басқармасының басшысы Мира Рахымжанқызының, басқа да театр ұжымдарының арнайы құттықтаулары оқылды. Мерекелік шарада жыл көлеміндегі театр спектакльдеріне тұрақты көрермен болғаны үшін Алмат Шалқарбаев, театр өнері туралы үздік видео түсірілімдер жасағаны үшін «QYZYLORDA» телеарнасының операторы Ахан Әлиев марапатталды. Сахна шеберлерінің өнердегі өмірі туралы үздік мақалалар жариялағаны үшін әріптесіміз Назерке Саниязова да «Театр өнерін насихаттаушы» аталымын иеленді. Сондай-ақ, артист Яхуда Халықұлов атындағы ауыспалы жүлдені артист Қанат Архабаев, Қазақстанның еңбек сіңірген артисі Әлия Арысбай атындағы ауыспалы жүлдені Ақтолқын Төлеуова, Қазақстанның халық артисі Серік Шотықов атындағы ауыспалы жүлдені Мәдениет саласының үздігі Бақытбек Темірбеков еншіледі. Мереке кезінде марапат пен қошемет театр ұжымына, оның жанашырларына арналды. Бұл қазіргідей ғаламтор мен кино дамыған уақытта театрмен теңдесетін өнер жоқ екенінің дәлелі болса керек.
Мөлдір ҚАЛЫМБЕТ,
Н.НҰРЖАУБАЙ (сурет).
>>> Біздің Facebook, Instagram парақшаларымыз бен Telegram каналымызға жазылыңыз! <<<
