Қызылорда қаласының іргесіндегі Қарауылтөбе ауылдық округінде қарқынды тірлік байқалады. Мұнда көпсалалы «Натишаева» жеке кәсіпкерлігінің шаруашылық кешені мен «Орда» шаруа қожалығы орналасқан. Кешенде мал бордақылау алаңы, мал сою пункті, ет бағытындағы құс фермасы және жылыжай бар.
Жуырда облыстық ауыл шаруашылығы басқармасы БАҚ өкілдеріне арнап баспасөз турын ұйымдастырды. Әуелі жылыжайдан бастадық. Мұнда қиярдың 4 түрлі тұқымы егіледі екен. Сонымен қатар қызанақтың бірнеше түрі, ақжелкен көктеп тұр.
– Кешен 2014 жылы салынған. Жылыжайда 19 адам еңбек етеді. Барлығын арнайы оқыттық. Республикалық семинар-тренингтерге жібердік. Оңтүстік Қазақстан облысындағы әріптестерімізбен тәжірибе алмастық. Ақырындап осы саланы игере бастадық. Тұтынушылардан сұраныс өте жоғары. Қызылордалықтарды толықтай жергілікті өніммен қамтамасыз етсек дейміз. Осы мақсатта тынбай тер төгудеміз, – дейді жылыжай кешенінің жетекшісі Ғалым Төлегенов.
Жылына екі мәрте егілетін өнімдерді баптаумен білікті агрономдар айналысады. Мұнда 20-ға жуық ауыл тұрғындары жұмыс істейді. Еңбекақылары да көңілге қонымды. Жұмысқа барып-келуі, түскі асы шаруашылық есебінен.
– Қызанақ 150 күнде өнім береді. Әр түптен 3 келіге жуық көкөніс аламыз. Қияр 120 күнде піседі. Бір түп 12 келіге дейін өнім береді. Тәулігіне 120 келі қызанақ, 280 келі қияр жиналады. Қызанақтан 6 мың түп егілді. Үш жылдан бері жылыжаймен айналысып, үлкен тәжірибе жинадық, – дейді агроном Нұркелді Пірәлиев.
Айта кетсек, шаруашылық былтыр «Ауыл шаруашылығы дақылдарын қорғалған топырақта өсіру» бюджеттік бағдарламасы арқылы жылыжайда өсірілген көкөніс дақылдарына 9729,5 мың теңге көлемінде субсидия алған. Ал, «Орда» шаруа қожалығы «Ауыл шаруашылығын қаржылай қолдау қоры» АҚ бастамасымен қала төңірегінде 10 гектар жерге салынған 120 жылыжайды лизингке алып, қазір онда қызанақ өсірілуде. Мамандардың сөзінше, 70 жылыжайдың 50-де қызанақ егілген. Өнімділігі өте жақсы. Шамамен, әр жылыжайдан 3-4 тонна өнім алуға болатын көрінеді. Мұнда 17 адам тұрақты түрде еңбек етеді. Өнімдер қала дүкендеріне көтерме бағамен жеткізіліп, сатылып жатыр. Экологиялық тұрғыдан таза, әрі табиғи өнім. Ең бастысы, химиялық қоспалардан ада.
Осы кешен аумағында құс фермасы да орналасқан. Онда ет бағытында құс өсірілуде. Мал мен құстың азығын шаруашылық өздері дайындайды. Бұл өз кезегінде қала халқын арзан етпен қамтамасыз етуге жағдай жасайды.
Құс фабрикасында қаз, үйрек, күркетауық, тауық, цесарка құсы өсірілуде. Фабрикада күніне 5 тоннаға жуық тауық еті өндіріліп, «Таза» белгісімен сатылымға шығарылып жатыр.
– Бізде 120 мың “Арбор-Айкрес” тұқымдас тауық өсіріледі. Күніне 5 тонна ет өндіруге мүмкіндігіміз жетеді. Құсты Алматы облысынан әкеліп отырмыз және өзіміз инкубациядан шығарамыз. Бүгінде құс фабрикасында 17 адам жұмыс жасайды. Өнімдеріміз қаланың ішінде 250 дүкенге сатылымға шықты. Алдағы уақытта сатылым аясын кеңейту жоспарда бар, – дейді құс өсіру шаруашылығына жетекшілік етіп отырған Кенжебек Қалмұратов.
Инкубацияға бір мезетте 35 мың жұмыртқа салынып 21 күнде тіршілікке айналдырады. Балапандарға 5 мәрте екпе салынып, салмағы 2 келіден асқан соң сойысқа жіберіледі. Жылына 900 мың балапан шығаруды мақсат еткен шаруашылықта қосымша инкубациялық жайлар мен тауық қоралар салынуда. Мұнан бөлек қаз-үйректер де көбейтілмекші. Бүгінде өсім беріп отырған олардың қарасы 2 мыңнан асқан.
Шаруа қожалыққа солтүстік өңірден асылтұқымды “Абердин-Ангус” мүйізді ірі қарасы әкелінген. Оны жергілікті “Әулиекөл” тұқымымен будандастыру жұмыстары қолға алынуда. Қазіргі уақытта кәсіпкердің мал бордақылау алаңында 300 бас ірі қара мен 500 бас қой бордақылануда. Бордақылар мал сою пунктінде сойылып, еті қала базарларына, дүкендерге жеткізілетін болады.
Қарауылтөбеде жұмыссыз жүрген жан жоқ. Басым бөлігі осы шаруашылықта еңбек етеді. Кәсіпкерлер мен тұрғындар тізе қоса қимылдап, ілкімді істерді қолға алған. Жақында ғана тақтайдай тегіс жол төсепті. Кәсіпкерлердің көмегімен әлеуметтік нысандар да бой көтерген. Жоқ-жітікке жәрдемдесіп тұру да назардан тыс қалмаған. Қысқасы, ынтымағы жарасқан жұрттың жұмыла жасаған жұмысы халық игілігіне бағытталған.
Нұрбек ДӘУРЕНБЕКОВ,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
