Былтыр Атырау қаласында өткен Ұлттық құрылтайдың үшінші отырысында Қазақстан Республикасында Ұлттық кітап күнін белгілеу туралы тапсырма берілген болатын. Осылайша елімізде атаулы күндердің тізбесі тағы бір мерекемен толықты. 23 сәуір – Ұлттық кітап күні болып белгіленді.
Кеше Бурабайда өткен IV Ұлттық құрылтайда да мәдениет саласына қатысты тың бастамалар айтылды. Мәселен, қазақ тіліндегі анимацияны дамыту. Бұл құптарлық бастама, себебі бала тілі мен ойын дамытуда мультфильмнің алар орны ерекше. Сондықтан балаларға арналған өнімнің қазақ тілінде жарық көруі маңызды деп ойлаймын.
Мемлекет басшысы «Шоқан. Қашқария сапары» деген мультфильмді мысалға келтірді. Оны өскелең ұрпаққа әйгілі тарихи тұлға Шоқан Уәлиханов туралы мәлімет беретін өте жақсы туынды деп бағалады. Қазақ тілінде ұлттық нақышта түсірілген осындай мультфильм көп болуы қажет.
Сонымен қатар Президент Тәуелсіздік жылдарында мәдениет саласында атқарылған ауқымды істерді атады. Кейінгі жылдары классикалық және заманауи музыкаға арналған сәулетті ғимараттар салынып, көптеген театр ашылды. Өнерге қызығушылық жоғары, көрермен залдары толы, премьералар мен спектакльдерге билет екі-үш апта бұрын сатылып кетеді. Мемлекет басшысы сахна өнеріне құштар жандардың арасында жастардың көп болуы жетістік екенін жеткізді.
Біздің облыста да кейінгі кездері жаңадан мәдениет ошақтары бой көтеруде. Мәселен, «Анаға тағзым», «Өнер орталығы» сынды заман талабына сай ғимараттар салынып, ел игілігіне берілді. Былтыр облыста «Руханият жылы» жарияланып, аудандарда «Руханият орталықтары» ашылып, пайдалануға берілді. Орталық ішіне музей, архив, кітапхана, ардагерлер, жастар, аналар кеңесі сынды ұйымдар шоғырланды. Бұл – мемлекетті біріктірудің моделі. Руханият жылының мазмұны мәдениетті қолдау болып айқындалды. Соның ішінде кітап оқу мәдениеті де бар. Жалпы «Руханият орталықтарының» ашылуы өзге облыстарға үлгі ретінде көрсетілді.
Мұның барлығын мәдениет саласындағы жарқын істердің бастамасы деп айтуға болады.
Нұрлыбек МЫҢЖАСОВ,
Ә.Тәжібаев атындағы облыстық
әмбебап-ғылыми кітапханасының директоры
>>> Біздің Facebook, Instagram парақшаларымыз бен Telegram каналымызға жазылыңыз! <<<
