Нұрымжан СОПБЕКОВ, облыстық мәслихат депутаты:
Қызылорда қаласында өткен Ұлттық құрылтайдың бесінші отырысында ел өміріндегі маңызды оқиғалар кеңінен қамтылды. Мемлекет басшысы Қасым-Жомарт Тоқаев төрт жылда құрылтай мүшелері ел дамуына ықпал ететін көптеген маңызды бастама көтеріп, айтылған ұсыныстар негізінде 26 заң қабылданғанын атап өтті.
Жиын барысында Президент бір палаталы Парламент туралы бастаманы халық қолдап отырғанына көңіл бөліп, оны Құрылтай деп атауға ұсыныс білдірді. Білуімізше, депутаттар енді пропорционалды жүйе қағидатымен сайланады. Мұндай тәсіл саяси партиялардың институционалдық рөлін күшейтеді, сондай-ақ олардың қоғам алдындағы жауапкершілігін арттырады.
Құрылтай барысында цифрландыру мен жасанды интеллект, экономика, энергетика, өнер мен мәдениет және өзге де салаларды дамыту мәселелеріне көңіл бөлінді.
Атап өтерлігі, Президент сөз басында Қызылорда облысының даму қарқынына жоғары бағасын беріп, бұл өңір нағыз еңбек адамдарының мекені деп жерлестеріміздің мерейін өсірді. Былтыр аймақтың жалпы ішкі өнімі 6,5 пайызға өсіп, 3 жылда облысқа 2 трлн теңгеге жуық инвестиция тартылды, 27 инвестициялық жоба жүзеге асырылды. Кейінгі 3 жылда аймақта 34 білім беру, 45 мәдениет және спорт нысаны салынған. Бұған қоса, 40 медицина нысаны ашылды.
– Менің тапсырмаммен Қызылордада 300 орынға арналған көпбейінді аурухана құрылысы басталды. Көп ұзамай 500 орындық емхана және 200 орындық перзентхана салынады. Бір сөзбен айтқанда, Қызылорда облысы барлық салада қарқынды дамуда. Облыстың жағдайы жалпы жақсы деп күмәнсіз айтуға болады. Бұл – әкім Нұрлыбек Нәлібаевтың белсенді, табанды жұмысының нәтижесі, – деді Мемлекет басшысы.
Президент жергілікті халықтың еңбекқорлығы мен ұйымшылдығын айта келіп, Сыр елі жұртшылығының бойынан туған жерге деген сүйіспеншілікті, қамқорлық пен жанашырлықты, нағыз отаншылдықты көретініне үлкен ықылас танытты. Облыс орталығымен қатар, әр ауылдың тазалығы көз тартады.
Сондай-ақ Президент Кіші Арал суының көлемін айтарлықтай көбейтуге мүмкіндік болатынына тоқталды. Қазір Көкарал бөгетін биіктету шаралары қолға алынып жатыр. Жоба осы жылдың соңында басталады.
