Бейсенбіні берекеге балайтынымыз бекер емес. Таңсәріден күннің көзі күз емес, көктем келгендей күйге енді. Қызылордалық әрбір азамат бұл күннен ерекшелік барын байқады. Себебі ел Президенті Қасым-Жомарт Кемелұлы Сырдағы серпінді тірлікті, айрықша өркендеуді көзімен көруге келді.
Мемлекет басшысы жұмыс сапарында жарқыраған жаңа заманауи нысандарды аралап, аймақ жұртшылығымен, зиялы қауыммен кездесті.
Айтулы сәтте іркіп қалуға болмас, мен үшін де киелі өлкедегі «Өнер орталығында» Президентпен жолығудың сәті туды.
Сәулелі ойды қорыта білетін адам үшін Мемлекет басшысының әрбір сөзі санаға салмақ салады. Қасым-Жомарт Кемелұлы сөз арасында жастардың дамуына ден қою қажет екенін қозғап, тәлімді тәрбие, дұрыс бағыт керек екенін қаперге салды.
Расында, қай кезде де тәртіп пен тәрбие болмаса, істің текке кеткені. Қазіргідей алмағайып уақытта жас буынды ұлттық нәрмен, ілкі дәстүрмен тәрбиелей отырып, жаңа заманға бейімдеу нағыз керек іс. Оның астарында жастарды ізгілікке, туған жерін шексіз қадірлеуге және тазалыққа үндеу секілді ой жатқанын сездік.
Айрықша күнде Президенттен байыпты бастама естідік. «Ірі мегаполис – Астана мен Алматыдан кейін жаңа кітапхана Қызылордада ашылады» деді. Бұл интеллектуалды ұлт болуға үндейтін, оқуға құштар жас буынға жаңа бағдар беретін үлкен қазына орталығы болатыны хақ. Ой-санасы биік ұрпақ өсіруге дәл осы заманауи кітапхананың берері мол болады деп іштей қуандық.
Тағы бір көкейге ой салғаны – цифрландыру ісіне көңіл бұру қажеттігін маңыздылардың қатарына қосуы. Жасанды интеллект өміріміздің бір бөлшегіне айналған уақытта оны ермекке емес, игілікке айналдыруға тиіспіз деген ой салды.
Байыпты басқосудан қанаттанып қайтқанымыз жасырын емес. Әсіресе, Президенттің облыста атқарылып жатқан игі істерге, аймақтың әлеуметтік-экономикалық дамуына оң бағасын беруі кеудемізге мақтаныш сезімін ұялатты.
Шуақты сәттеріміз көп болғай, Сырдың несібесі арта бергей!
Жақсыгүл ТОҒАНОВА,
М.Мәметова атындағы Қызылорда педагогикалық жоғары колледжінің директоры
