Елімізде Абай атындағы республикалық мамандандырылған дарынды балаларға арналған қазақ тілі мен әдебиетін тереңдете оқытатын орта мектеп-интернат бар. Алматы қаласындағы білім ордасының бір ерекшелігі – оқушылар негізгі пәндерден бөлек шешендік сөз өнері пәнін қатар игереді.
Мұндай өзгеше бағыттағы сабақ барысында баланың сөйлеу, жазу нормасын қалыптастыру, сөздердің мағынасын жете түсіну, ойлау жүйесін жетілдіру секілді дағдылары қалыптасады. Аталған мектеп-интернатының пән мұғалімі Жарқын Сәленұлы сабақ барысында Абай Құнанбайұлының шешендік өнеріне ерекше мән берілетінін айтады.
– Басты мақсат – оқушыларды қазақ тілінде еркін әрі сауатты сөйлеуге тәрбиелеу. Бабаларымыздың мәдени-әдеби жәдігері мен болмысы сөз құдіретіне бай екенін өскелең ұрпақтың санасына сіңіруге тырысамыз. Бұл орайда Абай мұралары да шет қалмайды. Сабақ барысында Абайдың сөз өнері, шешендік қыры, қарым-қатынаста қолданған сөйлеу әдісі секілді өзекті тақырыптар игеріліп, оқушылармен бірге талқылаймыз. Себебі, Абай шығармашылығы – өзіне дейінгі шешендік өнердің жетілген үлгісі, – дейді Жарқын Сәленұлы.
Екі жыл бұрын қолға алынған бастама қазір өз жемісін беріп келеді. Тіпті, шешендік сөз өнер бойынша мектепішілік сайыстар өткізіліп тұрады. Мектеп-интернат жанынан «Ділмәр» үйірмесі құрылған. Оқушылардың алды жоғары оқу орнының студенті атанып, білімін жетілдірсе, үйірме мүшелері сөз додасында топ жарып жүр. Ұстаздың ендігі тілегі – шешендік сөз өнері пәнін мектеп бағдарламасына енгізілсе деген арман.
Айта кетейік, аталған білім ордасының 60 жылдан астам тарихы бар. Сонау 1957 жылы малшы балаларына арналған республикалық деңгейдегі мектеп-интернат болып ашылып, 2003 жылы «Республикалық мамандандырылған дарынды балаларға арналған қазақ тілі мен әдебиетін тереңдете оқытатын орта мектеп-интернат» деген атауға ие болып, оған Үкімет қаулысымен 2006 жылы Абайдың есімі берілді.
Жалпы, шешендік өнер – ел құралып, халық қалыптаса бастағаннан бері халықтың өнеге тұтып, өмір тәжірибесіне пайдаланып келе жатқан ақындар мен шешендердің, хандар мен билердің, ел ағасы болған данышпандардың, жастайынан жалындап өскен өткір ойшылдардың аузынан шыққан дуалы, өнегелі, қисынды, қасиетті сөздер.
Рүстем АЙБОЛАТ,
Қорқыт ата атындағы Қызылорда университетінің 3-курс студенті
>>> Біздің Facebook, Instagram парақшаларымыз бен Telegram каналымызға жазылыңыз! <<<
