Балаларын байлыққа балаған «Алтын алқалы» ана Жанат Абайдуллаева сегіз құрсақ көтерген. Небәрі 34 жастағы келіншек бүгінде сүткенжесі Айсұлтанды босанып, бала күтіміне байланысты демалыста отыр.
Осыдан 16 жыл бұрын Нұрлан Шайменов есімді азаматпен отау құрып, үш атқамінер мен бес қызғалдақты дүниеге әкелді. Шаңырақтың шаттығы мен берекесін еселеген жас ана елдің демографиялық өсіміне үлес қосқанын мақтан етеді.
– Әйел болған соң, өмірге ұрпақ әкеліп, оны жетілдіріп өсіру парыз деп түсінемін. Денсаулығың көтерсе, Алланың берген перзенттерін дүниеге әкелгенге не жетсін?! Барлығы өз несібесімен туады. Бұдан да қиын заманда аналарымыз он баладан кем таппаған. Ал тәуелсіз елде өмір сүріп, бейбіт заманда көпбалалы болуға қорқатындарды түсінбеймін. Біздің бар байлығымыз – осы көзге көрінген ұл-қызымыз. Үлкенім Нұржан 14 жаста, әкесінің қолғанаты. Одан кейінгі Нұрай есімді қызым спортқа жақын, футбол үйірмесіне қатысады. Қыздарымның ішінде өнерге жақыны – Айару. Айлан, Жанерке, Ұлболсын менің көмекшілерім. Үйде 6 оқушы бар. Олар – қаламыздағы Абылайхан атындағы №140 орта мектептің оқушылары. Ал Әлинұр мен Айсұлтан – отбасымыздың еркесі. Перзенттерім бір-біріне бауырмал, тату болғанына қуанып қаламыз. Әкесі екеуіміз олардың әрбір ісіне марқайып, сүйсініп отырамыз. Бала отбасында ата-ананың мейіріміне, махаббатына бөленіп өсуі керек. Әсіресе қыздарымды еркелетіп, ұлдарымды кішкентайынан жауапкершілікті ұғынатын азамат болуға тәрбиелеймін,– дейді Жанат Пернебекқызы.
Ынтымақ пен ырыстың ұйытқысы бола білген көпбалалы аналар құрметке де, қошеметке де лайық. Алтын құрсақ аналардың дүниеге сәби әкеліп, оны тәрбиелеу жолында еткен еңбектерін ештеңемен теңестіре алмайсың. Түн ұйқысын төрт бөліп, перзенттерін «қанаттыға қақтырмай, тұмсықтыға шоқыттырмай» жетілдіріп, қоғамның бір кірпіші болып қалануына тер төгеді. Әр баласына деген махаббаты өлшеусіз, ықыласы ерек. Сондықтан да болар, «жұмақ ананың табанының астында» дейтіні.
Айсәуле ҚАРАПАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
