Өмір өтсе де жақсы адамның аты жадыңда мәңгілік жаңғырып тұрады. Керуен көші жылжыған сайын оның тұлғасы қалыптасып, бейнесі бекемделе түседі. «Тау алыстаған сайын биіктей түседі» деген даналық қағида – осының айғағы.
Бүгін біз сөз еткелі отырған Қамбарбек Мүбараков бүкіл ғұмырын халық мүддесімен ұштастыра білген абзал азамат, іскер басшы ретінде ел есінде ұзақ сақталары сөзсіз. Ол адами қасиетті өмірінің темірқазығындай берік ұстанып, еліне адал қызмет етті. Қамбарбек Амангелдіұлының есімі Сыр өңірінің тарихында талапшыл аудан әкімі, білікті қаржыгер-экономист ретінде жақсы таныс. Ол Шиелі ауданын басқарған 2020-2021 жылдары бүкіл жаһанды пандемия жайлап, жергілікті жұртты да әбігерге салған еді. Қауіпті індет дендеген шақта халықты сабырға шақырып, жедел шешім қабылдай білу аудан басшысы ретінде Қамбарбек Амангелдіұлының ұтымды ұйымдастыру және тығырықтан жол табу сияқты қасиеттерін айшықтай түсті. Денсаулық сақтау саласындағы күрмеуі қиын мәселелерді дер кезінде шешіп, ақ халаттылармен бірге алдыңғы шепте жүрді.
Ол сондай-ақ салық саласында абыройлы қызмет атқарып, аймақ бюджетінің кірісін толықтыруға зор үлес қосты. Облыстық салық комитетінде, атауы кейін мемлекеттік кірістер департаменті болып өзгерген құрылымда ұзақ жыл қызмет атқарып, мекеменің қалыптасуына, білікті мамандармен қамтамасыз етілуіне тікелей үлес қосып, жас мамандарды тәрбиелеп, кәсіби біліктілікке үйреткен ұстаз ретінде танылды. Одан кейін әр жылдары облыстық ауыл шаруашылығы басқармасын, Ы.Жақаев атындағы Қазақ күріш шаруашылығы ғылыми-зерттеу институтын, облыстық кәсіпкерлік және өнеркәсіп басқармасының жетекшілік тізгінін ұстады. Ал 2023 жылдың мамыр айынан бастап өмірінің соңына дейін облыстық экономика және қаржы басқармасының басшысы болды. Осы қызметте аймақ басшысы Нұрлыбек Машбекұлының тапсырмасына сәйкес облыстағы көптеген маңызды нысан мен инженерлік-инфрақұрылымдық жүйенің жоба-сметалық құжатын әзірлеп, тиісті министрліктен өткізу үшін күн демей, түн демей жұмыс істеді. Халық бүгінде сол нысандардың игілігін көріп отыр.
Ел сыйлаған азаматтың өмірден өткеніне бүгінде жылға жуықтады. Қамбарбек Амангелдіұлы қандай лауазымда еңбек етсе де бюджеттің кіріс бөлімінің нығаюына, салық қоржынының қомақты болуына бар күш-жігерін жұмсап, облыстың әлеуметтік-экономикалық деңгейінің алға басуына атсалысты. Оның жүріп өткен жолы, атқарған еңбегі кейінгі жас буынға үздік үлгі деп айтар едім.
Мархабат ЖАЙЫМБЕТОВ,
ҚР Парламенті Мәжілісінің депутаты
